ഏറെ നാളുകള്ക്ക് ശേഷം മലയാളത്തിന്റെ സൂപ്പർ താരങ്ങളായ മമ്മൂട്ടിയും മോഹൻലാലും ഒന്നിക്കുന്ന മഹേഷ് നാരായണൻ സംവിധാനം ചെയ്യുന്ന ചിത്രം ശ്രീലങ്കയില് പുരോഗമിക്കുകയാണ്.കഴിഞ്ഞ ദിവസമാണ് സിനിമയുടെ ചിത്രീകരണം ശ്രീലങ്കയില് പുനരാരംഭിച്ചത്. നയൻതാര, ഫഹദ് ഫാസില്, കുഞ്ചാക്കോ ബോബൻ, ദർശന രാജേന്ദ്രൻ തുടങ്ങി വൻതാരനിരയാണ് ചിത്രത്തില് അണിനിരക്കുന്നത്. സിനിമയെ കുറിച്ചുള്ള നിരവധി അപ്ഡേറ്റുകള് പുറത്തുവന്നെങ്കിലും പേര് മാത്രം പുറത്തുവിട്ടിരുന്നില്ല. ഇപ്പോഴിതാ ശ്രീലങ്കൻ ടൂറിസത്തിന്റെ ഫേസ്ബുക്ക് പേജില് വന്ന പോസ്റ്റാണ് ചിത്രത്തെ കുറിച്ചുള്ള ചർച്ചകള് വീണ്ടും സജീവമാക്കുന്നത്. കഴിഞ്ഞ ദിവസം ഷൂട്ടിംഗിനായി ശ്രീലങ്കയില് എത്തിയ മോഹൻലാലിനെ സ്വാഗതം ചെയ്തു കൊണ്ടുള്ള പോസ്റ്റിലാണ് ചിത്രത്തിന്റെ ടൈറ്റില് ലീക്കായത്.
പേട്രിയറ്റ് എന്ന സിനിമയുടെ ചിത്രീകരണത്തിനായി ശ്രീലങ്കയെ തിരഞ്ഞെടുത്ത തെന്നിന്ത്യൻ ഇതിഹാസം മോഹൻലാല്, രാജ്യത്തെ സിനിമാ ചിത്രീകരണ സൗഹൃദമെന്ന് വിശേഷിപ്പിച്ചു എന്നാണ് ശ്രീലങ്കൻ ടൂറീസം ഫേസ്ബുക്ക് പേജില് പങ്കുവച്ചിരിക്കുന്നത്. എന്നാല് ചിത്രത്തിന്റെ അണിയറ പ്രവർത്തകരുടെ ഭാഗത്ത് നിന്ന് ഇക്കാര്യത്തില് ഇതുവരെ ഒരു സ്ഥീരികരണവും ലഭിച്ചിട്ടില്ല. പോസ്റ്റിന് പിന്നാലെ പ്രതിഷേധവുമായി ആരാധകർ രംഗത്തെത്തി. വളരെ രഹസ്യമായി സൂക്ഷിച്ച ചിത്രത്തിന്റെ പേര് ഇത്തരത്തില് പുറത്തായതിലാണ് ആരാധകർ പ്രതിഷേധിച്ചത്.പത്തുദിവസത്തെ ചിത്രീകരണമാണ് ശ്രീലങ്കയില് ഉണ്ടാവുക. മോഹൻലാല്, കുഞ്ചാക്കോ ബോബൻ, ഫഹദ് ഫാസില്, ദർശന രാജേന്ദ്രൻ എന്നിവർ ഉള്പ്പെടുന്ന രംഗങ്ങളാണ് ഇവിടെ ചിത്രീകരിക്കുന്നത്. ശ്രീലങ്കയിലായിരുന്നു ചിത്രത്തിന്റെ ആദ്യ ഷെഡ്യൂള്. ഈ ഷെഡ്യൂളില് മമ്മൂട്ടിയും മോഹൻലാലും ഉള്പ്പെടെയുള്ള താരങ്ങള് പങ്കെടുത്തിരുന്നു. ശ്രീലങ്കയിലെ ഈ ഷെഡ്യൂളിന് ശേഷം എടപ്പാളില് നാലുദിവസത്തെ ചിത്രീകരണമുണ്ട്. കൊച്ചിയിലാണ് അടുത്ത ഷെഡ്യൂള്. ഈ ഷെഡ്യൂളില് മമ്മൂട്ടി പങ്കെടുക്കുമെന്നാണ് വിവരം. നയൻതാരയാണ് നായിക.ജൂലായില് ആണ് കൊച്ചി ഷെഡ്യൂള്. കൊച്ചി ഷെഡ്യൂളില് മോഹൻലാലും നയൻതാരയും പങ്കെടുക്കുന്നുണ്ട്.
