വൈദ്യുതി കുടിശിക വരുത്തിയയാളുടെ വീട്ടില്‍ വൈദ്യുതി വിച്ഛേദിക്കാൻ പോയി; പൊൻകുന്നം കെഎസ്‌ഇബി ഓഫീസിലെ ലൈൻമാനെ നായ കടിച്ചു; ആറ് കടികളേറ്റു

പൊൻകുന്നം: വൈദ്യുതി കുടിശിക വരുത്തിയയാളുടെ വീട്ടില്‍ കണക്ഷൻ വിച്ഛേദിക്കാൻ പോയ ലൈൻമാനെ അതേവീട്ടിലെ നായ കടിച്ചു.

പൊൻകുന്നം കെഎസ്‌ഇബി ഓഫീസിലെ ലൈൻമാൻ ശ്രീകാന്ത് (38) ആണ് നായയുടെ ആക്രമണത്തിന് ഇരയായത്.

ആറ് കടികളേറ്റു. കോട്ടയം മെഡിക്കല്‍ കോളജില്‍ പ്രവേശിപ്പിച്ച്‌ 36 കുത്തിവയ്പ്പെടുത്തു.

നായയ്ക്ക് പേവിഷ പ്രതിരോധകുത്തിവയ്പെടുത്തിരുന്നില്ല. സംഭവം സംബന്ധിച്ച്‌ പൊൻകുന്നം വീട്ടുവേലില്‍ ശ്രീകുമാർ എന്നയാള്‍ക്കെതിരെ കെഎസ്‌ഇബി അസിസ്റ്റന്‍റ് എൻജിനിയർ പൊൻകുന്നം പോലീസില്‍ പരാതി നല്‍കി.

ഈ മാസം 15ന് ഇയാളുടെ ഓട്ടോറിക്ഷയിടിച്ച്‌ വൈദ്യുതിത്തൂണ്‍ തകർന്ന സംഭവമുണ്ടായിരുന്നു. അതിന്‍റെ പിഴ ഇനിയും അടയ്ക്കാനുണ്ട്. കൂടാതെ കണക്‌ഷൻ വിച്ഛേദിക്കാനെത്തുമെന്ന് വിളിച്ചറിയിച്ചിട്ടും നായയെ കൂട്ടിലടയ്ക്കാത്തത് മനഃപൂർവമാണെന്ന് കരുതുന്നതായാണ് പരാതിയില്‍ പറഞ്ഞിരിക്കുന്നത്.