കെഎസ്‌ഇബിയില്‍ അടിയന്തിര നിയമനം; ആയിരത്തിലധികം താത്കാലിക ഒഴിവുകള്‍; നിയമനം എംപ്ലോയ്മെന്റ് എക്സ്ചേഞ്ച് വഴി

തിരുവനന്തപുരം: കെഎസ്‌ഇബിയില്‍ ആയിരത്തിലധികം താല്‍ക്കാലിക ജീവനക്കാരെ നിയമിക്കുന്നു.

നിയമനം എംപ്ലോയ്മെന്റ് എക്സ്ചേഞ്ച് വഴി ആയിരിക്കും. 179 ദിവസത്തേക്കാണ് നിയമനം.

എസ്‌എസ്‌എല്‍സി, അല്ലെങ്കില്‍ തത്തുല്ല്യ വിദ്യാഭ്യാസവും സർക്കാർ അംഗീകൃത ഇലക്‌ട്രീഷ്യൻ/ വയർമാൻ ട്രെഡില്‍ രണ്ടു വർഷത്തെ സ്റ്റേറ്റ്/ നാഷണല്‍ ട്രേഡ് സർട്ടിഫിക്കറ്റും പോസ്റ്റില്‍ കയറാനുമുള്ള കഴിവുമാണ് യോഗ്യത. തെരഞ്ഞെടുക്കപ്പെടുന്നവർക്ക് 15 ദിവസത്തെ പരിശീലനം നല്‍കും. ഇതിനു ശേഷമായിരിക്കും നിയമനം.

വനിതകളെ പരിഗണിക്കില്ല. ജില്ലാതലത്തില്‍ വരുന്ന ഒഴിവ് അനുസരിച്ചായിരിക്കും നിയമനം.

എംപ്ലോയ്മെന്റ് എക്സ്ചേഞ്ച് വഴി ജീവനക്കാരെ ലഭിച്ചില്ലെങ്കില്‍ കരാർ വഴി നിയമനം നടത്തും. മഴക്കെടുതി മൂലമുണ്ടാകുന്ന പ്രശ്നങ്ങള്‍ പരിഹരിക്കാനാണ് അടിയന്തിരമായി നിയമനം നടത്തുന്നത്.