കോട്ടയം പാലായിൽ വൻ ലഹരി മരുന്നു വേട്ട; മൂന്നുപേർ എക്‌സൈസിന്റെ പിടിയിൽ; കാഞ്ഞിരപ്പള്ളി, എരുമേലി, മുണ്ടക്കയം മേഖലകളിൽ വില്പനയ്ക്കായി കൊണ്ടുവന്ന 77 ഗ്രാം എംഡിഎംഎ , .3 ഗ്രാം എൽ.എസ്.ഡി സ്റ്റാമ്പ് എന്നിവയുമായി പിടിയിലായത് എരുമേലി സ്വദേശികൾ

സ്വന്തം ലേഖകൻ

കോട്ടയം:- ജില്ലയിലെ വിവിധ പ്രദേശങ്ങളിലെ മാരക മയക്കമരുന്നുകളുടെ പ്രധാന വിൽപ്പനക്കാർ പാലായിൽ എക്‌സൈസ് സ്പെഷ്യൽ സ്‌ക്വാഡിന്റെ പിടിയിൽ. എരുമേലി സ്വദേശികളായ അഷ്കർ അഷ്റഫ് (25), അൻവർഷാ N. N( 22 ), അഫ്സൽ അലിയാർ (21 ) എന്നിവരെ കോട്ടയം എക്‌സൈസ് സ്പെഷ്യൽ സ്‌ക്വാഡ് സർക്കിൾ ഇൻസ്പെക്ടർ രാജേഷ് ജോണിന്റെ നേതൃത്വത്തിലുള്ള എക്‌സൈസ് സംഘം അറസ്റ്റ് ചെയ്യുകയായിരുന്നു.

കാഞ്ഞിരപ്പള്ളി, എരുമേലി, മുണ്ടക്കയം മേഖലകളിൽ വ്യാപക വിൽപ്പന നടത്തുന്നതിനായി ബാംഗ്ളൂരിൽ നിന്നും അന്തർ സംസ്ഥാന ബസിൽ കടത്തി കൊണ്ട് വന്ന വൻ തോതിലുള്ള 77 ഗ്രാം MDMA , .3 ഗ്രാം L S D സ്റ്റാമ്പ് എന്നിവ ഇവരിൽ നിന്ന് കണ്ടെടുത്തു. കോട്ടയം ജില്ലയിലെ ഏറ്റവും വലിയ എംഡിഎംഎ വേട്ടയാണ് ഒരാഴ്ച നീണ്ട രഹസ്യ നീക്കത്തിലൂടെ എക്‌സൈസ് സംഘം നടത്തിയത്. ചെക്കിങ് ഒഴിവാക്കുന്നതിനായി അതിരാവിലെ ബാംഗ്ളൂരിൽ നിന്നുള്ള സ്വകാര്യ ബസിൽ പാലായിൽ എത്തിയ പ്രതികളെ ഓടി രക്ഷപെടാൻ ശ്രമിക്കുന്നതിനിടയിൽ സാഹസിക നീക്കത്തിലൂടെ പിടികൂടുകയായിരുന്നു.

പ്രതികളുടെ ബാഗിനുള്ളിൽ നിന്നും ഒളിപ്പിച്ച നിലയിലുള്ള ന്യൂ ജനറേഷൻ മാരക രാസ ലഹരി മയക്കു മരുന്നുകളായ MDMA, LSD സ്റ്റാമ്പ്‌ എന്നിവയാണ് കണ്ടെത്തിയത്. ബാംഗ്ലൂരിൽ നിന്നും വൻ തോതിൽ മയക്ക്മരുന്ന് ജില്ലയിൽ എത്തിച്ച് പ്രധാനമായും കോളേജ് വിദ്യാർത്ഥികൾക്കും യുവതി യുവാക്കൾക്കും വൻ ലാഭത്തിൽ വില്പന നടത്തി വന്നിരുന്ന പ്രതികൾ സ്വന്തം ഉപയോഗത്തിനും ആഡംബര ജീവിതം നയിക്കാനും ലഹരിയുടെ വഴി കണ്ടെത്തുകയായിരുന്നു എന്ന് ചോദ്യം ചെയ്യലിൽ സമ്മതിച്ചു.

ആഴ്ചയിൽ രണ്ട് തവണ ബാംഗ്ലൂരിലേക്ക് യാത്ര പോവാറുളള ഇവരെ എക്സൈസ് നിരീക്ഷണം നടത്തിവരുകയായിരുന്നു. കോട്ടയത്തെ മയക്കുമരുന്ന് ശൃഖലയിലെ പ്രധാനികളാണ് ഇവർ. എക്സൈസ് സർക്കിൾ ഇൻസ്പെക്ടർ രാജേഷ് ജോണിന്റെ നേതൃത്വത്തിൽ നടത്തിയ റെയ്‌ഡിൽ എക്സൈസ് ഇൻസ്പെക്ടർ അൽഫോൻസ് ജേക്കബ്, പ്രിവന്റീവ് ഓഫീസർമാരായ K.R.ബിനോദ്, K.N വിനോദ് സിവിൽ എക്സൈസ് ഓഫീസർമാരായ സുരേഷ്. S, ദീപു ബാലകൃഷ്ണൻ, അനീഷ് രാജ്, നിമേഷ് K.S, ശ്യാം ശശിധരൻ, പ്രശോഭ് K. Vഎക്സൈസ് ഡ്രൈവർ അനിൽ K.K എന്നിവർ പങ്കെടുത്തു.