സ്വകാര്യ ആശുപത്രികളില്‍ നാല് ലക്ഷത്തോളം ചിലവ് വരുന്ന ടിപ്സ് ചികിത്സ; ഇനി മുതൽ കോട്ടയം മെഡിക്കല്‍ കോളേജില്‍ സൗജന്യം; രണ്ടു പേർക്ക് ചികിത്സ വിജയകരമായി നടത്തി; കരള്‍ ചികിത്സയില്‍ ലോകോത്തര നിലവാരത്തിലുള്ള മറ്റൊരു മുന്നേറ്റം…..
ഗാന്ധിനഗർ: ലിവർ സിറോസിസ് മൂർഛിച്ചുണ്ടാകുന്ന വയറ്റിലെ അനിയന്ത്രിതമായ വെള്ളക്കെട്ട്, രക്തം ഛർദ്ദിക്കല്‍ എന്നീ അസുഖങ്ങള്‍ക്കുള്ള അതിനൂതന ചികിത്സാരീതിയായ ‘ടിപ്സ്’ (ട്രാൻസ്ജുഗുലാർ ഇൻട്രാഹെപ്പാറ്റിക് പോർട്ടോസിസ്റ്റമിക് ഷണ്ട്) കോട്ടയം മെഡിക്കല്‍ കോളേജിലും.
ഞായറാഴ്ച രണ്ടുപേർക്ക് ചികിത്സ വിജയകരമായി നടത്തി.
ഇന്റർവെൻഷനല്‍ റേഡിയോളജി വിഭാഗത്തിന്റെ നേതൃത്വത്തില്‍ ഇന്റേണല്‍ മെഡിസിൻ, മെഡിക്കല്‍ ഗ്യാസ്ട്രോ, സർജിക്കല്‍ ഗ്യാസ്ട്രോ എന്നീ വിഭാഗങ്ങളുടെ സഹകരണത്തോടെയാണ് ചികിത്സ നടത്തിയത്. വെല്ലൂർ സി.എം.സി. ഇന്റർവെൻഷനല്‍ റേഡിയോളജി വിഭാഗമാണ് പരിശീലനം നല്‍കിയത്.
ചികിത്സ വിജയിച്ചതോടെ കോട്ടയം മെഡിക്കല്‍ കോളേജ് കരള്‍ ചികിത്സയില്‍ ലോകോത്തര നിലവാരത്തിലുള്ള മറ്റൊരു മുന്നേറ്റത്തിന് തുടക്കംകുറിച്ചു. മെഡിക്കല്‍ കോളേജില്‍ ചികിത്സ സൗജന്യമാണ്.
Whatsapp Group 1 | Whatsapp Group 2 |Telegram Group
ടിപ്സ് എന്നാല്‍
ലിവർ സിറോസിസ് ബാധിച്ച്‌ മൂർധന്യാവസ്ഥയില്‍ എത്തുന്ന പലർക്കും വയറ്റില്‍ ഉണ്ടാവുന്ന അനിനിയന്ത്രിതമായ വെള്ളക്കെട്ടും മൂക്കിലൂടെ രക്തസ്രാവവും പതിവാണ്. ഇത് നിയന്ത്രിക്കുകയാണ് ‘ടിപ്സ്’ചെയ്യുന്നത്.
കരളിലേക്ക് രക്തമെത്തുന്നത് പോർട്ടല്‍ വെയിൻ എന്ന രക്തക്കുഴലിലൂടെയാണ്. ലിവർ സിറോസിസ് മൂലം രക്തസമ്മർദ്ദം കൂടി ഇത് അടയുന്നു. ‘ടിപ്സ്’ ചികിത്സയില്‍ ചെറിയ ഞരമ്പിലൂടെ സ്റ്റെൻഡ് കടത്തിവിട്ട് ബൈപ്പാസ് ചെയ്യുന്നു.
ഇത് രക്തസമ്മർദ്ദം കുറയ്ക്കുകയും രക്തത്തിന്റെ ഒഴുക്ക് വർധിപ്പിക്കുകയും ചെയ്യുന്നു. ഇത് ആരോഗ്യം പഴയസ്ഥിതിയിലേക്ക് എത്താൻ സഹായിക്കുമെന്ന് ഇൻറർവെൻഷണല്‍ റേഡിയോളജിസ്റ്റ് ഡോ. അശ്വിൻ പത്മനാഭൻ പറഞ്ഞു.
സമീപഭാവിയില്‍ ദിവസം നാലുപേർക്കുവരെ ചികിത്സ നല്‍കാനാകുമെന്നാണ് പ്രതീക്ഷ. കോട്ടയത്ത് ഒരു സ്വകാര്യ ആശുപത്രിയില്‍ മാത്രമാണ് നിലവില്‍ ഇത് ചെയ്തുവരുന്നത്. സ്വകാര്യ ആശുപത്രികളില്‍ കുറഞ്ഞത് നാല് ലക്ഷത്തോളം രൂപ ചെലവ് വരും.
തമിഴ്നാട് വെല്ലൂർ സി.എം.സി. ഇന്റർവെൻഷനല്‍ റേഡിയോളജി വിഭാഗം തലവൻ ഡോക്ടർ ശ്യാം കേശവന്റെ നേതൃത്വത്തിലാണ് പരിശീലന പരിപാടി നടത്തിയത്.
കോട്ടയം മെഡിക്കല്‍ കോളേജ് സൂപ്രണ്ട് ഡോ.ടി.കെ. ജയകുമാർ, പ്രിൻസിപ്പല്‍ ഡോ. എസ്. ശങ്കർ, റേഡിയോ ഡയഗ്നോസിസ് വിഭാഗം മേധാവി ഡോ. സജിത എന്നിവരുടെ പിന്തുണയോടെ നടത്തിയ പ്രവർത്തനത്തില്‍ ഡോ. അശ്വിൻ പത്മനാഭന്റെ നേതൃത്വത്തിലുള്ള ഇന്റർവെൻഷനല്‍ റേഡിയോളജി ടീം നേതൃത്വംവഹിച്ചു.
