മുണ്ടക്കയം പുലിക്കുന്നിൽ കേബിൾ വിതരണ ശൃംഖലയിൽ സാമൂഹ്യ വിരുദ്ധരുടെ അതിക്രമം: കേബിൾ ടിവിയുടെ കേബിളുകൾ മുറിച്ചു നശിപ്പിച്ചു; 20000 രൂപയുടെ നഷ്ടം; കുട്ടികളുടെ ഓൺലൈൻ പഠനം മുടങ്ങി

തേർഡ് ഐ ബ്യൂറോ

കോട്ടയം: മുണ്ടക്കയം പുലിക്കുന്നിൽ കേബിൾ വിതരണ ശൃംഖല സ്ഥാപിച്ചിരുന്ന ഫൈബർ കേബിളുകൾ സാമൂഹ്യ വിരുദ്ധർ മുറിച്ചു നശിപ്പിച്ചു.

മുണ്ടക്കയം പുലിക്കുന്ന് എസ്.എൻ.ഡി.പി ക്ഷേത്രത്തിനു സമീപത്തെ ഒപ്ടിക്കൽ ഫൈബർ കേബിൾ അടങ്ങിയ എൻക്ലോസറിലെ ഭാഗമാണ് മുറിച്ചു മാറ്റിയത്.

കഴിഞ്ഞ ദിവസം രാത്രി ഒൻപതരയോടെയായിരുന്നു സംഭവം. രാത്രിയിൽ ഇവിടെ എൻക്ലോസറിനു സമീപത്ത് കേബിളുകൾ മുറിച്ചു മാറ്റുകയായിരുന്നു.

പ്രദേശത്ത് 350 ഓളം വീടുകളിൽ കേബിൾ കണക്ഷും, 150 ഓളം വീടുകളിൽ ബ്രോഡ് ബ്രാൻഡ് ഇന്റർനെറ്റ് കണക്ഷനും ഉണ്ടായിരുന്നു. ഈ കണക്ഷനുകളെല്ലാം വെള്ളിയാഴ്ച ഉച്ചയ്ക്ക് പന്ത്രണ്ടുമണിവരെ മുടങ്ങിക്കിടക്കുകയായിരുന്നു.

ഏതാണ്ട് ഇരുപതിനായിരത്തോളം രൂപയുടെ നഷ്ടം ഉണ്ടായിരിക്കുന്നതായാണ് വിലയിരുത്തിയിരിക്കുന്നത്.

ഇന്റർനെറ്റ് കണക്ഷനുകൾ അടക്കം മുടങ്ങിയതോടെ വിദ്യാർത്ഥികളുടെ ഓൺലൈൻ പഠനം അടക്കം മുടങ്ങുകയും ചെയ്തു. സംഭവത്തിൽ സ്റ്റാർ വിഷൻ ചാനൽ അധികൃതർ പൊലീസിൽ പരാതി നൽകിയിട്ടുണ്ട്.