കൊച്ചിയില്‍ മരപ്പൊത്തിനുള്ളില്‍ ഉപേക്ഷിച്ച നിലയില്‍ 12 വെടിയുണ്ടകള്‍; വെടിയുണ്ടകള്‍ക്ക് കാലപ്പഴക്കമുള്ളതായി നിഗമനം; പൊലീസ് അന്വേഷണം ആരംഭിച്ചു

സ്വന്തം ലേഖിക

കൊച്ചി: കളമശേരിയ്ക്ക് സമീപം മഞ്ഞുമ്മലില്‍ മരത്തിന്റെ പൊത്തില്‍ ഉപേക്ഷിച്ച നിലയില്‍ വെടിയുണ്ടകള്‍ കണ്ടെത്തിയ സംഭവത്തില്‍ പൊലീസ് അന്വേഷണം തുടങ്ങി.

റഗുലേറ്റര്‍ കം ബ്രിഡ്‌ജിനടുത്ത് നിന്നാണ് 12 വെടിയുണ്ടകള്‍ കണ്ടെത്തിയത്.

നാട്ടുകാര്‍ അറിയിച്ചതിനെ തുടര്‍ന്ന് പൊലീസ് സ്ഥലത്തെത്തി ഇവ മൂടിയിട്ടു. വെടിയുണ്ടകള്‍ക്ക് കാലപ്പഴക്കമുള്ളതായി പൊലീസ് അറിയിച്ചു.

പിസ്റ്റളില്‍ ഉപയോഗിക്കുന്നതരം വെടിയുണ്ടകളാണിവ. വെടിയുണ്ടകള്‍ ഇവിടെ എങ്ങനെ എത്തി എന്നതിനെക്കുറിച്ച്‌ വ്യക്തതയില്ല.

പഴകിയ ഉണ്ടകള്‍ ആരെങ്കിലും ഉപേക്ഷിക്കാനായി മരപ്പൊത്തില്‍ നിക്ഷേപിച്ചതാകാമെന്നാണ് പ്രാഥമിക നിഗമനം.