സ്വന്തം ലേഖിക
കോട്ടയം :തലവേദന അനുഭവിക്കാത്ത ആരും ഉണ്ടാകില്ല. ചിലപ്പോള്‍ തലവേദന വളരെ കഠിനമായിരിക്കാം, വ്യക്തിക്ക് ഒരു ജോലിയും ചെയ്യാന്‍ കഴിഞ്ഞേക്കില്ല.അവര്‍ ജീവിതം അവസാനിപ്പിക്കുന്നതിനെക്കുറിച്ചും ചിന്തിച്ചേക്കാം. എന്നാല്‍ 98 ശതമാനം തലവേദനകളും അപകടകരമായ തരത്തിലുള്ളവയല്ല, ശരിയായ രോഗനിര്‍ണയവും ചികിത്സയും ഉപയോഗിച്ച്‌ എളുപ്പത്തില്‍ കൈകാര്യം ചെയ്യാന്‍ കഴിയും എന്നതാണ് വസ്തുത.
പലപ്പോഴും നമുക്ക് വരുന്ന മറ്റെന്തെങ്കിലും അസുഖങ്ങളുടെ തുടക്കം ആകും ഇത് എന്നും പറയപ്പെടുന്നു. പെതുവെ ജലദേഷം, അമിത സമ്മര്‍ദ്ദം എന്നിവ മൂലം ഈ വേദന ഉണ്ടാകാം. ഇത് അനുഭവപ്പെടുമ്ബോള്‍ ചെറിയ വേദന അല്ലെ എന്ന് കരുതി പലരും വേദന സംഹാരികള്‍ വാങ്ങി കഴിക്കാറാണ് പതിവ്. എന്നാല്‍ അത്തരക്കാര്‍ ഒന്ന് മനസ്സിലാക്കണം. തലയില്‍ അനുഭവപ്പെടുന്ന എല്ലാ വേദനയും ഒന്ന് അല്ല. വേദന അനുഭവപ്പെടുന്ന സ്ഥാനങ്ങള്‍ അനുസരിച്ച്‌ അവയുടെ സ്വഭാവത്തിലും മാറ്റം ഉണ്ടാകും. അതിനാല്‍ പ്രധാനം ഈ സ്ഥാനങ്ങള്‍ തിരിച്ചറിയുക എന്നതാണ്.
Whatsapp Group 1 | Whatsapp Group 2 |Telegram Group
തലവേദനയുടെ സാധാരണ കാരണങ്ങള്‍ പിരിമുറുക്കം തലവേദന (80 ശതമാനം)
മൈഗ്രെയ്ന്‍ അഥവാ ചെന്നിക്കുത്ത് (15 ശതമാനം) സൈനുസൈറ്റിസായിരിക്കും.
അപകടകരമായ തലവേദനയുടെ സവിശേഷതകള്‍
പുതിയതായി ആരംഭിച്ച തലവേദന: മൈഗ്രെയ്ന്‍ പോലെ ഇടവിട്ട് തലവേദന ഉണ്ടാകാത്ത ഒരാള്‍ക്ക് പെട്ടെന്ന് തലവേദനയുണ്ടെങ്കില്‍ അത് ഗൗരവമായി കാണണം.
തുടര്‍ച്ചയായി സാവധാനം വര്‍ധിക്കുന്ന തലവേദന: മൈഗ്രെയ്ന്‍ പോലുള്ള തലവേദന ഇടവിട്ടുള്ളതാണ്
പെട്ടെന്നുള്ള കടുത്ത തലവേദന
പെട്ടെന്നുള്ള ഛര്‍ദ്ദി, ഫിറ്റ്‌സ്, ഒരു വശത്തിന് ബലഹീനത, ബോധം നഷ്ടപ്പെടുക, കാഴ്ച നഷ്ടപ്പെടല്‍, പെരുമാറ്റ വ്യതിയാനങ്ങള്‍, നടക്കാന്‍ ബുദ്ധിമുട്ട്, കേള്‍വിക്കുറവ് തുടങ്ങിയ മറ്റ് ലക്ഷണങ്ങളുമായി ബന്ധപ്പെട്ട തലവേദന.
ലളിതമായ വേദനസംഹാരികളോട് പ്രതികരിക്കാത്ത തലവേദന
ടെന്‍ഷന്‍ മൂലം ഉള്ള വേദന
ടെന്‍ഷന്‍ മൂലമുള്ള വേദന അനുഭവപ്പെടുന്നത് തലയുടെ ഉച്ചിയിലാണ്. ഈ സ്ഥാനങ്ങളില്‍ മിതമായ തോതിലുള്ള വേദന ഇടയ്‌ക്കിടെ ഉണ്ടാകാം. ചില ആളുകളില്‍ ആഴ്ചയില്‍ പലതവണ ഈ വേദന വന്നു പോകാം.
സൈനസൈറ്റിസ് മൂലമോ മൈഗ്രേന്‍ മൂലമോ ഉള്ള വേദന
മൂക്കിലെ എല്ലുകള്‍ക്കും തലയുടെ മുന്‍ഭാഗത്തിനും കവിളുകള്‍ക്കും കണ്ണുകള്‍ക്കും ഇടയിലായി സ്ഥിതിചെയ്യുന്നിടമാണ് സൈനസുകള്‍. ഇവിടെ അനുഭവപ്പെടുന്ന വേദനയാണ് ഇത്. ക്ഷീണം, മൂക്കടപ്പ്, പല്ലിന്റെ ഭാഗത്ത് വേദന എന്നിവ ഈ വേദന അനുഭവപ്പെടുന്ന ആളുകളില്‍ ഉണ്ടാകാം.ഇത് മൂലം കണ്‍പുരികത്തിലും കവിളുകളിലും തലയുടെ മുന്‍ഭാഗത്തും വേദനയും സമ്മര്‍ദ്ദവും അനുഭവപ്പെടാം.
സെര്‍വികോജെനിക് തലവേദന
കഴുത്തിലും തലയുടെ പിന്‍ഭാഗത്തും അനുഭവപ്പെടുന്ന വേദനയാണ് ഇത്. കഴുത്തില്‍ തുടങ്ങി തലയുടെ പിന്നിലേക്ക് പടരുന്ന വേദന മറ്റെന്തെങ്കിലും രോഗാവസ്ഥയുടെ ഭാഗമായി ഉണ്ടാകാം. കൂടാതെ മൈഗ്രേനിന്റെ ലക്ഷണവും ആകാം ഇത്. കഴുത്ത് അനക്കാന്‍ പറ്റാത്ത അവസ്ഥയില്‍ വരെ വേദന നമ്മെ കൊണ്ട് എത്തിക്കാറുണ്ട്.
ക്ലസ്റ്റര്‍ തലവേദന
കണ്ണിന് ചുറ്റുമുള്ള വേദനയാണ് ഇതിന്റെ ലക്ഷണം.ഏറ്റവും കടുപ്പമേറിയ വേദനകളില്‍ ഒന്നായ ഇത് പെട്ടന്ന് അനുഭവപ്പെടുന്ന ഒന്നാണ്. മൂന്ന് മണിക്കൂര്‍ വരെ ഈ വേദന നീണ്ട് നില്‍ക്കാം. കൂടാതെ സമയം കൂടുന്നത് അനുസരിച്ച്‌ വേദന പതിയെ കവിളിലേക്കും , കഴുത്തിലേക്കും, മൂക്കിലേക്കും എല്ലാം പരക്കാം.
അതേസമയം ഒരു പരിധി വരെ സ്വയം നിയന്ത്രിച്ചാല്‍ തലവേദനയെ നമുക്ക് അകറ്റി നിര്‍ത്താം. ശരീരത്തിലെ ജലാംശം നിലനിര്‍ത്തുക. അതിനായി ധാരാളം വെള്ളം കുടിക്കുക. ചെറിയ വേദന അനുഭവപ്പെടുപ്പോള്‍ ഐസ് നിറച്ച പ്ലാസ്റ്റിക് പാക്കറ്റ് നെറ്റിയില്‍ വയ്‌ക്കുക.ഒപ്പം ഇരുട്ടുള്ള മുറിയിലെ ഉറക്കം, തലയ്‌ക്കും കഴുത്തിനും ചൂടും തണുപ്പും നല്‍കല്‍, മസാജ് എന്നിങ്ങനെയുള്ള മാര്‍ഗങ്ങളും സ്വീകരിക്കാവുന്നതാണ്.
ഇത് വേദനയ്‌ക്ക് ആശ്വാസം നല്‍കും.ഇനി ഒന്ന് ഓര്‍ക്കുക ആവശ്യമെങ്കില്‍ മാത്രം വേദനസംഹാരികള്‍ കഴിക്കുക. വേദന തുടര്‍ന്നാല്‍ ഡോക്ടറെ കണ്ട് വേണ്ട നിര്‍ദ്ദേശങ്ങള്‍ സ്വീകരിക്കുക.
