മൃഗശാലയിലെ ജീവനക്കാരെ വെട്ടിച്ച് കടന്ന ഹനുമാൻ കുരങ്ങിനെ കണ്ടെത്തി; മ്യൂസിയത്തിന് സമീപത്തുള്ള മരത്തിനു മുകളിൽ തമ്പടിച്ച കുരങ്ങിനെ പിടികൂടാൻ ശ്രമങ്ങൾ ആരംഭിച്ചു

സ്വന്തം ലേഖകൻ

തിരുവനന്തപുരം: മൃഗശാലയിലെ ജീവനക്കാരെ വെട്ടിച്ചു കടന്ന ഹനുമാൻ കുരങ്ങിനെ കണ്ടെത്തി. മൃഗശാലയ്ക്ക് ഉള്ളിൽത്തന്നെ ഒരു ആഞ്ഞിലി മരത്തിനു മുകളിലാണ് ഹനുമാൻ കുരങ്ങിനെ കണ്ടെത്തിയത്. കാട്ടുപോത്തിന്റെ കൂടിനോടു ചേർന്നുള്ള ഭാഗത്താണിത്. അതേസമയം, കുരങ്ങിനെ ഇതുവരെ പിടികൂടാനായിട്ടില്ല.

തിരുപ്പതിയിൽ നിന്നെത്തിച്ച 3 വയസ്സുള്ള പെൺ ഹനുമാൻ കുരങ്ങ്, ഇന്നലെ വൈകിട്ട് പരീക്ഷണാർഥം കൂട് തുറന്നപ്പോഴാണ് ചാടിപ്പോയത്. രാവിലെ മുതൽ കുരങ്ങിനെ കണ്ടെത്താൻ ശ്രമം നടക്കുകയായിരുന്നു. ഇന്നലെ മൃഗശാലയുടെ പ്രധാന കവാടത്തിനു പുറത്തുപോയിരുന്നു. ഇതിന്റെ ഇണ ഇപ്പോഴും മൃഗശാലയിൽ കൂട്ടിനുള്ളിലുണ്ട്.

അതിനാലാണ് പെൺകുരങ്ങ് തിരിച്ചെത്തിയതെന്നാണ് അധികൃതരുടെ അനുമാനം. മറ്റു സ്ഥലങ്ങളിലേക്കു പോകുന്നതിനു മുൻപ് കുരങ്ങിനെ കൂട്ടിലെത്തിക്കാനുള്ള ശ്രമം പുരോഗമിക്കുകയാണ്.