സാമ്പത്തിക തർക്കത്തെ തുടർന്നു ഏറ്റുമാനൂർ സ്വദേശിയെ കാറിടിച്ചു കൊലപ്പെടുത്താൻ ശ്രമം: ഗുരുതരമായി പരിക്കേറ്റ ഏറ്റുമാനൂർ സ്വദേശി തെള്ളകത്തെ സ്വകാര്യ ആശുപത്രിയിൽ; ഏറ്റുമാനൂരിലെ പ്രമുഖ വ്യവസായിയും ക്വട്ടേഷൻ സംഘത്തിലെ മൂന്നു പേരും പിടിയിൽ

തേർഡ് ഐ ക്രൈം

ഏറ്റുമാനൂർ: ഏറ്റുമാനൂരിൽ സാമ്പത്തിക തർക്കത്തെ തുടർന്നു പണം കടംവാങ്ങിയ ഏറ്റുമാനൂർ സ്വദേശിയെ കാറിടിച്ച് കൊലപ്പെടുത്താൻ ക്വട്ടേഷൻ. മഹാരാഷ്ട്ര രജിസ്‌ട്രേഷനിലുള്ള കാറിലെത്തിയ ക്വട്ടേഷൻ സംഘം അതിരമ്പുഴ – പാറോലിച്ചൽ റോഡിൽ വച്ച് ഏറ്റുമാനൂർ സ്വദേശിയെ ഇടിച്ചു വീഴ്ത്തിയ ശേഷം രക്ഷപെടാൻ ശ്രമിക്കുകയായിരുന്നു. നിയന്ത്രണം വിട്ട കാർ സമീപത്തെ മതിലിൽ ഇടിച്ചു മറിഞ്ഞതിനാൽ, പ്രതികൾ പിടിയിലായി. ക്വട്ടേഷൻ സംഘം കാറിടിച്ചു വീഴ്ത്തിയതിനെ തുടർന്നു പരിക്കേറ്റ ഏറ്റുമാനൂർ അതിരമ്പുഴ കുടിലിൽ വീട്ടിൽ സെബാസ്റ്റ്യനെ (നെൽസൺ-58) തെള്ളകം മാതാ ആശുപത്രിയിൽ പ്രവേശിപ്പിച്ചു.

ശനിയാഴ്ച രാവിലെ ഏഴു മണിയോടെയായിരുന്നു സംഭവം. അതിരമ്പുഴ – പാറോലിയ്ക്കൽ റോഡിലായിരുന്നു അക്രമ സംഭവങ്ങൾ. സെബാസ്റ്റിയനും ഏറ്റുമാനൂരിലെ വ്യവസായിയായ ബ്ലേഡ് കാരനും തമ്മിൽ സാമ്പത്തിക വിഷയത്തിൽ തർക്കമുണ്ടായിരുന്നു. ഇതിനിടെ സെബാസ്റ്റ്യനെ കൊലപ്പെടുത്താൻ ഗുണ്ടാ സംഘങ്ങൾക്കു ഏറ്റുമാനൂരിലെ വ്യവസായി ക്വട്ടേഷൻ നൽകുകയായിരുന്നു.

ശനിയാഴ്ച പുലർച്ചെ നടക്കാനിറങ്ങിയ സെബാസ്റ്റ്യനെ ക്വട്ടേഷൻ സംഘം കാറിടിപ്പിച്ച് വീഴ്ത്തുകയായിരുന്നു. പാറോലിച്ചൽ ഭാഗത്തു നിന്നും അതിരമ്പുഴ ഭാഗത്തേയ്ക്കു വരികയായിരുന്ന കാർ അമിത വേഗത്തിൽ എത്തി നടന്നു പോകുകയായിരുന്ന സെബാസ്റ്റിയനെ ഇടിച്ചു തെറിപ്പിച്ചു. ഗുരുതരമായി പരിക്കേറ്റ സെബാസ്റ്റ്യൻ റോഡിൽ തലയിടിച്ചു വീഴുകയായിരുന്നു. ഓടിക്കൂടിയ നാട്ടുകാർ ചേർന്നാണ് സെബാസ്റ്റിയനെ ആശുപത്രിയിൽ എത്തിച്ചത്. അപകടത്തിൽ ശേഷം കാറോടിച്ചു പോകാൻ ശ്രമിച്ചെങ്കിലും, അമിത വേഗത്തിൽ പാഞ്ഞ കാർ നിയന്ത്രണം തെറ്റി ഇവിടെ മതിലിൽ തന്നെ ഇടിച്ചു മറിയുകയായിരുന്നു.

നാട്ടുകാർ വിവരം അറിയിച്ചതോടെ സ്ഥലത്ത് എത്തിയ ഏറ്റുമാനൂർ പൊലീസ് സംഘം പ്രതികളെ പിടികൂടി. മൂന്നു പേരെ പൊലീസ് സംഘം ക്സ്റ്റഡിയിൽ എടുത്തിട്ടുണ്ട്. കേസിലെ പ്രധാന പ്രതിയായ വ്യവസായിയെ കസ്റ്റഡിയിൽ എടുത്ത പൊലീസ് സംഘം ഇയാളെ ചോദ്യം ചെയ്തു വരികയാണ്. ഏറ്റുമാനൂർ സ്വദേശിയായ ബ്ലേഡ് കാരനായ വ്യവസായിയിൽ നിന്നും സെബാസ്റ്റ്യൻ പണം കടം വാങ്ങിയിരുന്നു. ഈ പണം തിരികെ ലഭിക്കുന്നതിനെച്ചൊല്ലി ഇരുവരും തമ്മിൽ തർക്കമുണ്ടായിരുന്നു. പണം തിരികെ നൽകാതെ വന്നതിനെ തുടർന്നാണ് ക്വട്ടേഷൻ സംഘം ഇയാളെ കാറിടിച്ചു കൊലപ്പെടുത്താൻ ശ്രമിച്ചത്.