തട്ടിമാറ്റിയിട്ടും വിടാതെ ചീറിയടുത്ത് നായ; പത്ത് മാസം പ്രായമുള്ള കുഞ്ഞിനെ കടിച്ചെടുത്തോടാന്‍ തെരുവുനായയുടെ ശ്രമം; പിതാവ് കുഞ്ഞിനെ രക്ഷിച്ചെടുത് മൂന്ന് മിനിറ്റോളം നീണ്ട മല്‍പിടിത്തത്തിനൊടുവിൽ
സ്വന്തം ലേഖകൻ
മലപ്പുറം: മലപ്പുറത്ത് പത്ത് മാസം പ്രായമുള്ള കുഞ്ഞിനെ കടിച്ചെടുത്തോടാന്‍ തെരുവുനായയുടെ ശ്രമം. പിതാവിന്റെ കയ്യിലിരുന്ന കുഞ്ഞിനെ കടിച്ചെടുക്കാനുള്ള ശ്രമത്തിനിടെ ഇരുവര്‍ക്കും പരിക്കേറ്റു.
ആദ്യതവണ കുഞ്ഞിനെ മാറ്റിപ്പിടിച്ചെങ്കിലും വിടാതെ ആക്രമിച്ച തെരുവുനായയില്‍ നിന്ന് മകനെ രക്ഷിക്കാൻ പിതാവിന് ഏറെ പണിപ്പെടേണ്ടി വന്നു.
Whatsapp Group 1 | Whatsapp Group 2 |Telegram Group
ഇന്നലെ രാവിലെ എട്ടോടെ മെലേ അരിപ്രയിലാണു സംഭവം. മൂന്ന് മിനിറ്റോളം തെരുവുനായയുമായി മല്‍പിടിത്തം നടത്തിയാണ് പിതാവ് കുഞ്ഞിനെ രക്ഷിച്ചെടുത്തത്. പിതാവ് കുഞ്ഞുമായി സ്വന്തം വീടിന് മുന്നില്‍ നില്‍ക്കുമ്പോഴാണ് റോഡിന്റെ എതിര്‍വശത്തു നിന്നും തെരുവുനായ ഓടിയെത്തിയത്.
കുഞ്ഞിനെ ലക്ഷ്യം വെച്ച്‌ വന്ന നായ കുഞ്ഞിനെ ചാടിക്കടിക്കുകയായിരുന്നു. കുഞ്ഞിനെ മാറ്റിപ്പിടിച്ചതോടെ പിതാവിന്റെ കൈയില്‍ കടിച്ചു.
തട്ടിമാറ്റിയിട്ടും വിടാതെ ചീറിയടുത്ത നായ കുഞ്ഞിന്റെ തുടയിലും കടിച്ചു. ബഹളം കേട്ട് ഓടിയെത്തിയ ഭാര്യയ്ക്കു കുഞ്ഞിനെ കൈമാറിയിട്ടും തെരുവുനായ ആക്രമണം തുടരുകയായിരുന്നു.
ഇവരെ ആക്രമിക്കുന്നതിനു മുന്‍പ് മേലേ അരിപ്രയിലെ ബസ് സ്റ്റോപ്പില്‍ നിന്ന വിദ്യാര്‍ത്ഥിയെയും തിരൂര്‍ക്കാട് സ്‌കൂള്‍പടിക്കു സമീപം നിന്ന മറ്റൊരു വിദ്യാര്‍ത്ഥിയെയും ഇതേ നായ ആക്രമിച്ചിരുന്നു. എല്ലാവരും മഞ്ചേരി മെഡക്കല്‍ കോളജ് ആശുപത്രിയില്‍ ചികിത്സ തേടി.
