വിദേശ ബാങ്കിൽ നിന്ന് കോടികളുടെ വായ്പയെടുത്തു മുങ്ങിയ കോട്ടയം സ്വദേശികൾക്കെതിരേ കേസ്: വൈക്കം,തലയോലപറമ്പ്, വെള്ളൂർ,കടുത്തുരുത്തി, കുറവിലങ്ങാട് സ്വദേശികൾക്കെതിരേയാണ് കേസെടുത്തത്.

വൈക്കം: വിദേശ ബാങ്കിൽ നിന്ന് കോടികൾ വായ്പ എടുത്തശേഷം അടക്കാതെ മുങ്ങിയ കോട്ടയം സ്വദേശികൾക്കെതിരേ കേസ്. ബാങ്ക് അധികൃതരുടെ പരാതിയെ തുടർന്ന് കോട്ടയത്തെ വിവിധ പോലീസ് സ്റ്റേഷനുകളിലാണ് കേസെടുത്തത്.

വൈക്കം,തലയോലപറമ്പ്, വെള്ളൂർ,കടുത്തുരുത്തി, കുറവിലങ്ങാട് അടക്കം ജില്ലയിൽ എട്ടോളം പേർ ഏഴരകോടിയോളം രൂപ കബളിപ്പിച്ചെന്നാണ് കേസ്.

വൈക്കത്ത് ചാലപ്പറമ്പിൽ പെട്രോൾ പമ്പുനടത്തുന്ന പാർട്ട്ണർമാരിലൊരാളായ തലയോലപറമ്പ് സ്വദേശി 1.17 കോടിയോളം രൂപയാണ് വായ്പയെടുത്തത്. ഇയാൾ ഇപ്പോൾ വിദേശത്താണ്.

കൊറോണ ബാധയുണ്ടായ സമയത്താണ് ദുബായിലെ ബാങ്കിൽ നിന്ന് ഇവർ വായ്പ എടുത്തത്. വായ്പ അടക്കാതെ ഇവർ മുങ്ങിയതോടെ ബാങ്ക് അധികൃതർ ജില്ലാ പോലീസ് മേധാവിക്ക് പരാതി നൽകിയതോടെയാണ് പ്രതികൾക്കെതിരെ അതാത് സ്റ്റേഷനുകളിൽ കേസെടുത്തത്