ഈ നിമിഷം എന്നെക്കാൾ സന്തോഷവാനായ മറ്റാരുമില്ല….! റിലീസ് ചെയ്ത് 16 വർഷങ്ങൾക്ക് ശേഷം അന്യൻ ബോളിവുഡിലേക്ക് റീമേക്ക് ചെയ്യുന്നു ; സന്തോഷം പങ്കുവച്ച് ശങ്കർ

സ്വന്തം ലേഖകൻ

ചെന്നൈ : റിലീസ് ചെയ്ത് 16 വർഷങ്ങൾക്ക് ശേഷം തമിഴ് സൂപ്പർ ഹിറ്റ് ചിത്രം അന്യൻ ബോളിവുഡിലേക്ക് റീമേക്ക് ചെയ്യുന്നു.

ശങ്കർ തന്നെയാണ് ചിത്രത്തിന്റെ ഹിന്ദി പതിപ്പും ഒരുക്കുന്നത്.ചിത്രത്തിൽ രൺവീർ സിംഗ് ആണ് നായകനായി എത്തുന്നത്. പാൻഇന്ത്യ പ്രൊജക്റ്റായ ചിത്രം 2022 പകുതിയോടെ ചിത്രീകരണം ആരംഭിക്കും.

‘ഇന്ത്യൻ സിനിമയുടെ മുൻനിര ദീർഘവീക്ഷകരിൽ ഒരാളായ ശങ്കറുമൊത്ത് സഹകരിച്ച് പ്രവർത്തിക്കാൻ പോകുന്നു എന്ന വിവരം അഭിമാനത്തോടെ അറിയിക്കുന്നുവെന്നാണ് രൺവീർ ട്വീറ്റ് ചെയതത്.പെൻ മൂവിസിന്റെ ബാനറിൽ ഡോ.ജയന്തിലാൽ ഗാഡയാണ് ചിത്രം നിർമ്മിക്കുന്നത്.

2001ൽ പുറത്തിറങ്ങിയ നായകിന് ശേഷം ശങ്കർ സംവിധാനം ചെയ്യുന്ന രണ്ടാമത്തെ ഹിന്ദി ചിത്രം കൂടിയാണ് ഇത്. 2005ലാണ് സൈക്കോളജിക്കൽ ത്രില്ലറായി അന്യൻ റിലീസ് ചെയ്തത്. ചിത്രത്തിൽ നായകനായി എത്തിയത് വിക്രം ആയിരുന്നു.

അമ്പി, റെമോ, അന്യൻ എന്നിങ്ങനെ ദ്വന്ദ്വ വ്യക്തിത്വമുള്ള കഥാപാത്രമായിരുന്നു വിക്രമിന്റേത്. നടന്റെ കരിയറിലെ ഏറ്റവും മികച്ച പ്രകടനങ്ങളിൽ ഒന്നായിരുന്നു ഇത്. നെടുമുടി വേണു, പ്രകാശ് രാജ് എന്നിവർ ചിത്രത്തിൽ കേന്ദ്രകഥാ പാത്രമായി എത്തിയിരുന്നു.

അന്യൻ നേരത്തെ അപരിചിത് എന്ന പേരിൽ ഹിന്ദിയിലേക്ക് മൊഴിമാറ്റം ചെയ്തിരുന്നു.