നിലപാടിൽ മാറ്റമില്ല; ആര്യാടൻ ഷൗക്കത്തിനെതിരായ പരാമര്‍ശം പി വി അൻവര്‍ പിൻവലിക്കണം; ഉറച്ച്‌ വി ഡി സതീശൻ

പാലക്കാട് : പി.വി അൻവർ യുഡിഎഫ് സ്ഥാനാർത്ഥി ആര്യാടൻ ഷൗക്കത്തിനെ കുറിച്ച്‌ നടത്തിയ പരാമർശം പിൻവലിക്കണമെന്ന് ആവർത്തിച്ച്‌ പ്രതിപക്ഷ നേതാവ് വിഡി സതീശൻ.

ഇക്കാര്യത്തില്‍ മാറ്റമില്ലെന്നും അൻവറുമായി ബന്ധപ്പെട്ട വിഷയത്തില്‍ നാളെ വൈകീട്ടോടെ തീരുമാനമുണ്ടാകുമെന്നും വിഡി സതീശൻ വ്യക്തമാക്കി.

എനിക്കെതിരെയും അൻവർ ആരോപണമുന്നയിച്ചു. അത് അവിടെ കിടക്കട്ടെ, അത് പിൻവലിക്കണമെന്നുമില്ല. പക്ഷേ സ്ഥാനാർത്ഥിക്കെതിരായ പരാമർശം പിൻവലിക്കണമെന്നതില്‍ മാറ്റമില്ലെന്നും അദ്ദേഹം വ്യക്തമാക്കി.

യുഡിഎഫ് മുന്നണിയില്‍ കയറാനുള്ള നീക്കങ്ങള്‍ വിജയം കാണാതായതോടെ പി.വി അൻവർ ക്യാമ്പ് പ്രതിസന്ധിയില്‍. സമ്മർദം ശക്തമാക്കുന്നതിന്റെ ഭാഗമായി നിലമ്പൂരില്‍ അൻവറിന്റെ ഫ്ലെക്സ് ബോർഡുകള്‍ നിറക്കുകയാണ് പ്രവർത്തകർ.