സൂപ്പർസ്റ്റാർ രജനികാന്തിന്റെ ബ്ലോക്ക്ബസ്റ്റർ ചിത്രം ‘ജയിലർ’ രണ്ടാം ഭാഗത്തിന്റെ ടീസർ പുറത്തുവിട്ട് അണിയറപ്രവർത്തകർ.
സിനിമയുടെ റിലീസ് തീയതിയും നിർമ്മാതാക്കളായ സണ് പിക്ചേഴ്സ് ഔദ്യോഗികമായി പ്രഖ്യാപിച്ചു. റിലീസിനെക്കുറിച്ച് മാസങ്ങളായി സോഷ്യല് മീഡിയയില് പ്രചരിച്ചിരുന്ന അഭ്യൂഹങ്ങള്ക്ക് വിരാമമിട്ടുകൊണ്ടാണ് സണ് പിക്ചേഴ്സ് ടീസർ പങ്കുവച്ചത്. ഒക്ടോബർ 15ന് ജയിലർ- 2 ലോകമെമ്പാടുമുള്ള തിയേറ്ററുകളില് എത്തുമെന്ന അടിക്കുറിപ്പോടെയാണ് ടീസർ എത്തിയിരിക്കുന്നത്. നവരാത്രി പ്രമാണിച്ചാണ് ചിത്രം തിയേറ്ററുകളില് എത്തുക. അവധി ദിവസങ്ങള് ആയതിനാല് ചിത്രത്തിന്റെ കളക്ഷന് വലിയ രീതിയില് ഗുണം ചെയ്യുമെന്നാണ് കണക്കുകൂട്ടല്.
ടീസറില് രജനികാന്തിന്റെ ലുക്ക് വെളിപ്പെടുത്തിയിട്ടില്ലെങ്കിലും താരത്തിന്റെ സാന്നിദ്ധ്യം വ്യക്തമാക്കുന്ന ചില ദൃശ്യങ്ങള് ആരാധകരെ ആവേശം കൊള്ളിക്കുന്നുണ്ട്. 2023ലെ വമ്പൻ വിജയത്തിന് ശേഷം സംവിധായകൻ നെല്സണ് ദിലീപ് കുമാറും അനിരുദ്ധ് രവിചന്ദറും രജനികാന്തിനൊപ്പം വീണ്ടും ഒന്നിക്കുന്നു എന്ന പ്രത്യേകതയും ജയിലർ 2-നുണ്ട്. ചിത്രീകരണം ഈ വർഷം ആദ്യമേ പൂർത്തിയായിരുന്നു.
Whatsapp Group 1 | Whatsapp Group 2 |Telegram Group
വിരമിച്ച ജയിലറായ മുത്തുവേല് പാണ്ഡ്യൻ തന്റെ മകനെ ആക്രമിച്ചവർക്കെതിരെ അധോലോക ബന്ധങ്ങള് ഉപയോഗിച്ച് നടത്തുന്ന പ്രതികാരമായിരുന്നു ഒന്നാം ഭാഗത്തിന്റെ പ്രമേയം. ആക്ഷനും ഡാർക്ക് കോമഡിയും നിറഞ്ഞ ചിത്രം തമിഴ് സിനിമയിലെ തന്നെ ഏറ്റവും വലിയ പണംവാരി ചിത്രങ്ങളിലൊന്നായി മാറിയിരുന്നു.
രണ്ടാം ഭാഗത്തില് വമ്പൻ താരനിരയാണ് അണിനിരക്കുന്നത്. മലയാളത്തില് നിന്നും മോഹൻലാലും കന്നടയില് നിന്നും ശിവരാജ്കുമാറും അതിഥി വേഷങ്ങളില് വീണ്ടും എത്തിയേക്കുമെന്നാണ് സൂചന. ഇതുകൂടാതെ ബോളിവുഡില് നിന്നും വൻ താരനിരയെയാണ് അണിയറപ്രവർത്തകർ ഇത്തവണ ഒപ്പം കൂട്ടിയിരിക്കുന്നത്. മിഥുൻ ചക്രവർത്തി, വിദ്യാ ബാലൻ, ഹൃതിക് റോഷൻ എന്നിവർ ചിത്രത്തില് പ്രധാന വേഷങ്ങളില് എത്തുന്നുണ്ട്. എന്നാല് ഇവരുടെ കഥാപാത്രങ്ങളെക്കുറിച്ചുള്ള വിവരങ്ങള് ഇതുവരെ പുറത്തുവിട്ടിട്ടില്ല.
