തിരുവനന്തപുരം: കെ.സി. വേണുഗോപാലിനെ പുകഴ്ത്തിയുള്ള കെ. സുധാകരൻ്റെ പോസ്റ്റില് അതൃപ്തി പരസ്യമാക്കി കെപിസിസി പ്രസിഡൻ്റ് സണ്ണി ജോസഫ്. സുധാകരൻ്റെ ഫേസ്ബുക്ക് പോസ്റ്റ് അസമയത്താണെന്നും നിലപാട് പറയേണ്ടത് പാർട്ടിക്കുള്ളിലാണെന്നും സണ്ണി ജോസഫ് പറഞ്ഞു.
മുഖ്യമന്ത്രി ആരാകണമെന്ന് ഹൈക്കമാൻഡ് തീരുമാനിക്കുമെന്നും കെപിസിസി പ്രസിഡൻ്റ് വ്യക്തമാക്കി.
“കോണ്ഗ്രസ് ഭരണത്തില് വരുമെന്നുള്ള പ്രതീക്ഷയാണ് ഇത്തരം പ്രചരണങ്ങള്ക്ക് പിന്നില്. സുധാകരന്റെ പ്രസ്താവന അനുചിതമാണ്. നിലപാട് പാർട്ടിക്കുള്ളില് ആണ് പറയേണ്ടത്. ഉള്പ്പാർട്ടി ജനാധിപത്യം ഉള്ള പാർട്ടിയാണ് കോണ്ഗ്രസ്. മുഖ്യമന്ത്രിയെ തീരുമാനിക്കാൻ പാർട്ടിക്ക് വ്യവസ്ഥാപിതമായ മാർഗങ്ങളുണ്ട്. നിലവില് മുഖ്യമന്ത്രിയുടെ പേരുമായി ബന്ധപ്പെട്ടുള്ള ചർച്ചയ്ക്ക് സമയമായിട്ടില്ല.
Whatsapp Group 1 | Whatsapp Group 2 |Telegram Group
മുഖ്യമന്ത്രിയെ നിശ്ചയിക്കുന്നതിന് കോണ്ഗ്രസിന് വ്യക്തമായ നടപടിക്രമം ഉണ്ട്. ഹൈക്കമാൻഡാണ് അതില് ഒരു തീരുമാനം പറയുക. എന്നാല് സോഷ്യല് മീഡിയകളിലെ ഫേക്ക് അക്കൗണ്ടുകളിലൂടെയാണ് ഇപ്പോള് ചില പേരുകള് ഉയരുന്നത്. തക്കമായ വേദിയിലാണ് പേരുകള് പറയേണ്ടത്.
അഭിപ്രായമുണ്ടെങ്കില് പറയാം എന്നാല് പേരുകള് പറയേണ്ട സമയമായിട്ടില്ല. അസമയത്താണ് പേരുകള് പറയുന്നത്. മാധ്യമങ്ങളിലൂടെയും സാമൂഹ്യമാധ്യമങ്ങളിലൂടെയും അല്ല നിലപാട് വ്യക്തമാകേണ്ടത്”, സണ്ണി ജോസഫ് മാധ്യമങ്ങളോട് പറഞ്ഞു.
തെരഞ്ഞെടുപ്പ് വിധി വരും മുൻപേ മുഖ്യമന്ത്രി സ്ഥാനത്തിനായി കോണ്ഗ്രസില് പിടിവലി മുറുകുകയാണ്. രമേശ് ചെന്നിത്തലയ്ക്കായി ആദ്യം ശബ്ദമുയർത്തിയ കെ. സുധാകരൻ കെ.സി. വേണുഗോപാലിനെ പുകഴ്ത്തി കഴിഞ്ഞ ദിവസം ഫേസ്ബുക്കില് പോസ്റ്റ് പങ്കുവച്ചതോടെയാണ് ചർച്ചകള്ക്കും വിവാദങ്ങള്ക്കും വീണ്ടും തുടക്കമായത്.
സുധാകരൻ്റെ പോസ്റ്റിന് താഴെ വ്യാപക കമൻ്റുകളുമായി സതീശൻ പക്ഷത്തുള്ള നേതാക്കള് രംഗത്ത് വന്നിരുന്നു. കമന്റുകള് അനിയന്ത്രിതമായതോടെ സുധാകരൻ കമൻ്റ് ബോക്സ് ഓഫ് ചെയ്യുകയും ചെയ്തിരുന്നു.
