കനത്ത കാറ്റും മഴയും: മരം വീണ് ജില്ലയിൽ കനത്ത നാശം; മൂലവട്ടത്തും കാരാപ്പുഴയിലും പനച്ചിക്കാട്ടും വീടുകൾ തകർന്നു

സ്വന്തം ലേഖകൻ

ചിത്രങ്ങൾ – വിഷ്ണു ഗോപാൽ

കോട്ടയം: ശക്തമായ മഴയിലും കാറ്റിലും ജില്ലയിലെ വിവിധ സ്ഥലങ്ങളിൽ വ്യാപക നാശനഷ്ടം. കാറ്റടിച്ച് മൂലേടം, പനച്ചിക്കാട്, വേളൂർ, വൈക്കം എന്നിവിടങ്ങളിലായി നൂറിലേറെ വീടുകൾ തകർന്നു. ഞായറാഴ്ച രാവിലെയാണ് കാറ്റും ശക്തമായ മഴയും ഉണ്ടായത്. നിരവധി വീടുകൾക്ക് മുകളിൽ മരങ്ങൾ വീണു. വൈദ്യുതി തൂണുകൾ ഒടിഞ്ഞുവീണതിനാൽ പലസ്ഥലത്തും വൈദ്യുതിബന്ധം ഇല്ലാതായി. ഗതാഗതം തടസപ്പെട്ടു. നാട്ടുകാരും അഗ്നിരക്ഷാസേന ഉദ്യോഗസ്ഥരും ചേർന്ന് മണിക്കൂറുകൾ കൊണ്ടാണ് വീടിനു മുകളിൽ വീണ മരങ്ങൾ മുറിച്ച് നീക്കിയത്.

മൂലവട്ടം , തുരുത്തുമ്മേൽ , മുപ്പായിക്കാട് , തൃക്കയിൽ പ്രദേശങ്ങളിൽ 25 വീടുകൾ വ്യാപകമായി തകർന്നിട്ടുണ്ട്. പനച്ചിക്കാട് പ്രദേശത്ത് പന്ത്രണ്ട് വീടുകളും തകർന്നു.

മൂലവട്ടം തുരുത്തുമ്പേൽ കട്ടച്ചിറയിൽ കെ .വി മാധവൻ, കെ.വി മോഹനൻ , ഇല്ലിപ്പറമ്പിൽ ശിവൻകുട്ടി , തുരുത്തുമ്മേൽ പ്രകാശൻ , പ്ലാക്കിൽ ചിറ ജോസഫ് , തുരുത്തുമ്മേൽ തങ്കച്ചൻ , ഗൗരി , പുത്തൻപുരയിൽ രാജേഷ് എന്നിവരുടെ വീടുകളാണ് തകർന്നത്.

ഹെൽപ്പ് ഡെക്‌സുമായി ഡിവൈ.എഫ്.ഐ

മൂലവട്ടത്തെ തകർത്ത കാറ്റിൽ ഹെൽപ്പ് ഡെസ്‌കുമായി രംഗത്തിറങ്ങിയത് ഡിവൈഎഫ്‌ഐ പ്രവർത്തകർ. മൂലവട്ടം മുപ്പായിക്കാട് ഡിവൈഎഫ്‌ഐ യൂണിറ്റ് കമ്മിറ്റിയും പ്രവർത്തകരുമാണ് മരങ്ങൾ വെട്ടിമാറ്റാനും മറ്റു സഹായങ്ങൾക്കുമായി മുന്നിൽ നിന്നത്. അടിയന്തര സാഹചര്യങ്ങളിൽ സഹായം ആവശ്യമുള്ളവർ വിളിക്കാനുള്ള ഫോൺ നമ്പരും ഇവർ സോഷ്യൽ മീഡിയയിലൂടെ നൽകിയിരുന്നു.