കോട്ടയം: ഓണമടുത്തതോടെ മാഫിയ സംഘം ലഹരി വില്‍പ്പനയ്ക്ക് വൻസന്നാഹം നടത്തുകയാണെന്ന് രഹസ്യാന്വേഷണ വിഭാഗത്തിന്റെ മുന്നറിയിപ്പ്.
ജില്ലയുടെ വിവിധ ഭാഗങ്ങളില്‍ നിന്ന് കഞ്ചാവും എം.ഡി.എം.എയുമായി യുവാക്കളെ പിടികൂടിയെങ്കിലും വൻസ്രാവുകള്‍ പുറത്തുണ്ടെന്നാണ് പൊലീസിന്റെ വിവരം. ടൂറിസം കേന്ദ്രീകരിച്ചും നിരീക്ഷണം ശക്തമാക്കാനാണ് പൊലീസ് തീരുമാനം.
മുൻപ് ഓണമാകുമ്പോള്‍ വാറ്റുകാരായിരുന്നു കളത്തിലിറങ്ങിയിരുന്നതെങ്കില്‍ ഇപ്പോള്‍ ഹൈബ്രിഡ് കാഞ്ചാവും രാസലഹരിയും അന്യസംസ്ഥാനങ്ങളില്‍ നിന്ന് എത്തിക്കുകയാണ്. ജില്ലാ പൊലീസ് മേധാവിയുടെ നിർദേശ പ്രകാരം നാർക്കോട്ടിക് ഡിവൈ.എസ്.പിയുടെ നേതൃത്വത്തില്‍ പ്രത്യേക സംഘത്തിനും രൂപം നല്‍കിയിട്ടുണ്ട്. സ്ഥിരം കഞ്ചാവ് കച്ചവടക്കാർ, ഇപ്പോള്‍ പിടിയിലായവരുടെ സുഹൃത്തുക്കള്‍ എന്നിവരടക്കമുള്ളവരെ നിരീക്ഷിച്ചും നേരിട്ടുകണ്ടുമാകും പ്രവർത്തനം.
വിദേശത്ത് നിന്ന് ഹൈബ്രിഡ് കഞ്ചാവും അന്യസംസ്ഥാനങ്ങളില്‍ നിന്ന് കഞ്ചാവും എത്തിക്കാനുള്ള സാദ്ധ്യതയും മുൻകൂട്ടിക്കാണുന്നുണ്ട്. പതിവ് ലഹരി കച്ചവടക്കാർ തന്നെയാണ് ഇതിന് പിന്നിലും. വിലയും ലാഭവും ലഹരിയും കൂടുതലാണെന്നതാണ് കച്ചവടക്കാർക്കും പ്രിയം.
Whatsapp Group 1 | Whatsapp Group 2 |Telegram Group
കഞ്ചാവെത്തിക്കാൻ ഭായിമാർ
അന്യസംസ്ഥാനങ്ങളില്‍ നിന്ന് കിലോക്കണക്കിന് കഞ്ചാവ് എത്തിക്കാൻ അന്യ സംസ്ഥാനക്കാരുടെ പ്രത്യേക സംഘമുണ്ട്. ഈ മാസം മൂന്ന് കിലോ കഞ്ചാവ് ഭായിമാരില്‍ നിന്ന് പിടികൂയിട്ടുണ്ട്. ഈവർഷം ഇതുവരെ അമ്പത് കിലോയോളം കഞ്ചാവാണ് പിടിച്ചെടുത്തത്. ഒരു കിലോയ്ക്ക് മുകളില്‍ കൈവശംവച്ചാല്‍ മാത്രമേ ജാമ്യമില്ലാ വകുപ്പനുസരിച്ച്‌ കേസെടുക്കാനാകൂ. അതിനാല്‍ ഇതിനെ സിന്തറ്റിക് മയക്കുമരുന്നിന്റെ ഗണത്തില്‍പ്പെടുത്തണമെന്നാണ് ആവശ്യം. സമൂഹമാദ്ധ്യമങ്ങള്‍ വഴി ഗ്രൂപ്പുകള്‍ ഉപയോഗപ്പെടുത്തിയാണ് വിപണനം.
ടൂറിസം കേന്ദ്രങ്ങളും നിരീക്ഷണത്തില്‍
ഓണം പ്രമാണിച്ച്‌ അന്യജില്ലകളില്‍ നിന്ന് ഉള്‍പ്പെടെ ആളുകള്‍ എത്തുമെന്നതിനാല്‍ ടൂറിസം കേന്ദ്രങ്ങളിലും പ്രത്യേക നിരീക്ഷണമുണ്ടാവും. നേരിട്ട് പരിശോധന നടത്തുന്നത് ടൂറിസത്തെ ബാധിക്കുമെന്നതിനാല്‍ രഹസ്യ വിഭാഗം ഹോട്ടല്‍ ഉടമകള്‍ക്കും ഹൗസ് ബോട്ട് ഉടമകള്‍ക്കും വിവരങ്ങള്‍ അറിയിക്കാൻ നിർദേശം നല്‍കിയിട്ടുണ്ട്. ഓണം സമാധാന പൂർണമാക്കുന്നതിന്റെ ഭാഗമായി ടൂറിസം സംരംഭകരുടെ യോഗവും ഉടനെ വിളിക്കും. ഇതിന് പുറമേ എക്സൈസ് കണ്‍ട്രോള്‍ റൂമും തുറന്നിട്ടുണ്ട്.
