കോട്ടയം: വാകത്താനം ഗവ. ആശുപത്രി ശോചനീയാവസ്ഥയിൽ. ഒരുകാലത്ത് രോഗികളെ കിടത്തി ചികിത്സിച്ചിരുന്ന ഈ ആശുപത്രി ഇപ്പോൾ രോഗശയ്യയിലാണ്.
നിലവിൽ ആശുപത്രി പ്രവര്‍ത്തിക്കുന്നത് വി.ജെ.സഖറിയ മെമ്മോറിയല്‍ കെട്ടിടത്തിലാണ്. ജീവനക്കാര്‍ക്കും രോഗികള്‍ക്കും നിന്ന് തിരിയാൻ പോലും സ്ഥലമില്ലാത്ത അവസ്ഥയാണിപ്പോൾ.
പഴയ കെട്ടിടം പൊളിച്ചു കളഞ്ഞ്,
നാട്ടുകാര്‍ പിരിവെടുത്തുവാങ്ങിയ സ്ഥലത്ത് പുതിയ കെട്ടിടം പണിയാന്‍ ആരംഭിച്ചു. എന്നാൽ ഇപ്പോൾ അവിടെ അവശേഷിക്കുന്നത് ഏതാനും തുരുമ്പിച്ച ഇരുമ്പ് കമ്പികൾ മാത്രമാണ്. തുടർന്ന് നിര്‍മ്മാണം പൂര്‍ത്തിയാക്കാന്‍ വേണ്ടിയുള്ള ഫണ്ടില്ലായ്മയാണ് അധികൃതര്‍ ഉയര്‍ത്തുന്ന കാരണം. കൂടാതെ, പൂര്‍ത്തിയാക്കിയ ജോലിക്ക് പോലും തുക ലഭിക്കാത്തതിനെ തുടര്‍ന്ന് കരാറുകാരും പണി മുടക്കി പിന്മാറുകയായിരുന്നു.
Whatsapp Group 1 | Whatsapp Group 2 |Telegram Group
മാടപ്പള്ളി ബ്ലോക്ക് പഞ്ചായത്തിന്‍റെ കീഴിലാണ് ഈ ആശുപത്രി പ്രവര്‍ത്തിക്കുന്നത്. ആശുപത്രിയിൽ എത്തുന്ന രോഗികൾ മഴയത്തും വെയിലത്തും മണിക്കൂറുകളോളം കാത്തുനില്‍ക്കേണ്ടുന്ന ഗതികേടിലാണ്.
ആശുപത്രിയുടെ നിര്‍മാണ പ്രവര്‍ത്തനങ്ങള്‍ പുനരാരംഭിക്കാനുള്ള നടപടികള്‍ സര്‍ക്കാരിന്‍റെയും ജനപ്രതിനിധികളുടെയും ഭാഗത്തുനിന്നുണ്ടാകണമെന്ന് കേരള കോണ്‍ഗ്രസ് വാകത്താനം മണ്ഡലം കമ്മിറ്റി ആവശ്യപ്പെട്ടു.
പ്രസിഡന്‍റ് ജോസ് മാത്യു അധ്യക്ഷത വഹിച്ചു. വിനോ വാഴയ്ക്കല്‍, സിബി പാറപ്പ, ബാബു കുര്യന്‍, മാത്യു ഏബ്രഹാം എന്നിവര്‍ പ്രസംഗിച്ചു.
