കണ്ണൂര്‍ : അന്‍വര്‍ യുഡിഎഫിന്റെ ഭാഗമാകുമെന്ന് കോണ്‍ഗ്രസ് നേതാവ് കെ സുധാകരന്‍. അദ്ദേഹത്തിന്റെ താല്‍പ്പര്യങ്ങള്‍ പരമാവധി സംരക്ഷിച്ചുകൊടുക്കാന്‍ ഞങ്ങള്‍ക്കെല്ലാം താല്‍പ്പര്യമുണ്ടെന്നും അന്‍വറുമായി തനിക്ക് വ്യക്തിപരമായ ബന്ധമുണ്ടെണെന്നും ആ ബന്ധം കൂടി ഉപയോഗിച്ച്‌ സ്‌നേഹമസൃണമായ ഒരു റിലേഷന്‍ഷിപ്പ് ഐക്യജനാധിപത്യമുന്നണിയില്‍ അന്‍വറിനെ വെച്ചുകൊണ്ട് ഉണ്ടാക്കുമെന്ന് കെ സുധാകരന്‍ കണ്ണൂരില്‍ മാധ്യമങ്ങളോട് പറഞ്ഞു.
നിലമ്പൂര്‍ ഉപതെരഞ്ഞെടുപ്പിലെ യുഡിഎഫ് സ്ഥാനാര്‍ത്ഥി പ്രഖ്യാപനത്തിന് പിന്നാലെ ഇടഞ്ഞു നില്‍ക്കുന്ന പി വി അന്‍വറിനെ അനുനയിപ്പിക്കാനുള്ള ശ്രമത്തിലാണ് സുധാകരന്‍.
യുഡിഎഫില്‍ ഉള്‍പ്പെടുത്തുന്നത് സംബന്ധിച്ച്‌ തീരുമാനമെടുക്കാന്‍ രണ്ടു ദിവസത്തെ സമയം അനുവദിച്ചെന്ന തൃണമൂല്‍ കോണ്‍ഗ്രസ് നേതാക്കളുടെ പരാമര്‍ശം മാധ്യമങ്ങള്‍ ചൂണ്ടിക്കാട്ടിയപ്പോള്‍, അത് രണ്ടു ദിവസത്തിന് ശേഷം പറയാമെന്ന് കെ സുധാകരന്‍ പ്രതികരിച്ചു. ഘടകകക്ഷിയാക്കാനുള്ള തീരുമാനം ഇപ്പോള്‍ എടുക്കാനാകുമോയെന്ന മാധ്യമപ്രവര്‍ത്തകരുടെ ചോദ്യത്തിന്, എപ്പോള്‍ വേണമെങ്കിലും എടുക്കാം. ആര്‍ക്കാ അതിന് തടസ്സമുള്ളത്. ഇന്ത്യന്‍ നാഷണല്‍ കോണ്‍ഗ്രസ് തീരുമാനമെടുത്താല്‍ ആരാ എതിര്‍ക്കുന്നത് ? കെപിസിസി തീരുമാനമെടുത്താല്‍ ആരു ചോദ്യം ചെയ്യുമെന്ന് കെ സുധാകരന്‍ ചോദിച്ചു.
Whatsapp Group 1 | Whatsapp Group 2 |Telegram Group
അന്‍വറിനെപ്പോലെ ഒരാളെ യുഡിഎഫിന് കിട്ടുന്നത് ഒരു അസ്സെറ്റ് അല്ലേയെന്നും സുധാകരന്‍ അഭിപ്രായപ്പെട്ടു. അന്‍വറിന്റെ പാര്‍ട്ടി മത്സരിക്കുമോയെന്നത് സംബന്ധിച്ച്‌ തനിക്കറിയില്ല. അതല്ല അങ്ങനെ വന്നാല്‍ അപ്പോള്‍ നോക്കാം. ഇതെല്ലാം രാഷ്ട്രീയമല്ലേ, ഇതെല്ലാം സ്വാഭാവികമല്ലേ… ഇതിലൊന്നും ബന്ധത്തിന് പോറലേല്‍ക്കാന്‍ സാധിക്കില്ല. അഥവാ തൃണമൂല്‍ മത്സരിച്ചാല്‍ യുഡിഎഫിനെ ബാധിക്കില്ലെന്നും കെ സുധാകരന്‍ പറഞ്ഞു.
അന്‍വറുമായി കൂടിക്കാഴ്ചട നടത്തുകയും വിശദമായി സംസാരിക്കുകയും ചെയ്തിരുന്നു. കോണ്‍ഗ്രസും അന്‍വറും തമ്മിലുള്ള ബന്ധം രാഷ്ട്രീയ രംഗത്ത്, കേരളത്തിലും മലപ്പുറം ജില്ലയിലും ചരിത്രപരമായ ഡീവിയേഷന്‍ ഉണ്ടാക്കുമെന്ന കാര്യത്തില്‍ തര്‍ക്കമില്ല. ഞങ്ങളെല്ലാം അതിന്റെ പിറകിലാണ്. കോണ്‍ഗ്രസ് ഒറ്റക്കെട്ടാണ്. അന്‍വറും അതില്‍ നിന്നും പിറകോട്ടല്ല. അന്‍വറിന് അഭിപ്രായവ്യത്യാസങ്ങള്‍ ഉണ്ടാകാം. അത് സ്വാഭാവികമല്ലേയെന്ന് കെ സുധാകരന്‍ ചോദിച്ചു. ഒരു മുന്നണിയ്ക്കകത്തും പാര്‍ട്ടിക്കകത്തും പല അഭിപ്രായങ്ങള്‍ ഉണ്ടാകാറില്ലേ. അവന്‍ വേണം ഇവന്‍ വേണം എന്നെല്ലാം അഭിപ്രായങ്ങള്‍ ഉണ്ടാകാറില്ലേ. അതെല്ലാം സ്വാഭാവികമാണ്. ആ സ്വാഭാവികതയില്‍ ഒന്നല്ലേ നടത്താന്‍ പറ്റൂ. അത് നടത്തിക്കഴിഞ്ഞുവെന്ന് കെ സുധാകരന്‍ പറഞ്ഞു.
