ഇടുക്കിയില്‍ വ്യക്തിവൈരാഗ്യത്തെ തുടര്‍ന്ന് അയല്‍വാസി തീ കൊളുത്തി; ഗുരുതരമായി പൊള്ളലേറ്റ് ചികിത്സയിലായിരുന്ന യുവതി മരിച്ചു

ഇടുക്കി: ഉടുമ്പൻചോലയില്‍ അയല്‍വാസി പെട്രോളൊഴിച്ച്‌ തീകൊളുത്തിയ യുവതി മരിച്ചു.

പാറക്കല്‍ ഷീലയാണ് മരിച്ചത്. തേനി മെഡിക്കല്‍ കോളേജില്‍ ചികിത്സയിലിരിക്കെ രാവിലെയോടെയായിരുന്നു അന്ത്യം.

കഴിഞ്ഞ വെള്ളിയാഴ്ചയാണ് യുവതിയെ അയല്‍വാസി ശശി ആക്രമിച്ചത്.
ഏലത്തോട്ടത്തില്‍ പണിയെടുക്കുകയായിരുന്ന ഷീലയെ പ്രതി കടന്നുപിടിച്ച്‌ വീടിനുള്ളില്‍ പൂട്ടിയിട്ട ശേഷം പെട്രോളൊഴിച്ച്‌ തീകൊളുത്തുകയായിരുന്നു.

നാട്ടുകാർ വിവരമറിയിച്ചതിനെത്തുടർന്ന് പൊലീസെത്തി, വാതില്‍ പൊളിച്ചാണ് യുവതിയെ ആശുപത്രിയില്‍ പ്രവേശിപ്പിച്ചത്.
അറുപത് ശതമാനത്തിലേറെ പൊള്ളലേറ്റിരുന്നു.

ആദ്യം സ്വകാര്യ ആശുപത്രിയിലും പിന്നീട് തേനി മെഡിക്കല്‍ കോളേജിലേക്കും മാറ്റി. പ്രതിയെ അറസ്റ്റ് ചെയ്തു. ഇയാള്‍ക്കും പൊള്ളലേറ്റിരുന്നു. ഷീലയുടെ മൃതദേഹം പോസ്റ്റ്‌മോർട്ടത്തിന് ശേഷം ബന്ധുക്കള്‍ക്ക് വിട്ടുകൊടുക്കും.