സ്കൂള്‍ വിദ്യാര്‍ഥിയെ സ്വകാര്യ ബസില്‍ നിന്ന് അസഭ്യം പറഞ്ഞ് ഇറക്കിവിട്ടു; കോട്ടയം-ചങ്ങനാശേരി റൂട്ടില്‍ ഓടുന്ന ലീല എക്സിക്യുട്ടീവ് ബസ് ജീവനക്കാരൻ അറസ്റ്റില്‍

കോട്ടയം: സ്കൂള്‍ വിദ്യാര്‍ഥിയെ സ്വകാര്യ ബസില്‍നിന്ന് ഇറക്കിവിട്ട ജീവനക്കാരനെ പോലീസ് കസ്റ്റഡിയിലെടുത്തു.

കളത്തിപ്പടിയിലെ സ്വകാര്യ സ്കൂള്‍ എട്ടാം ക്ലാസ് വിദ്യാര്‍ഥിക്കാണ് ദുരനുഭവം നേരിട്ടത്.

കോട്ടയം-ചങ്ങനാശേരി റൂട്ടില്‍ ഓടുന്ന ലീല എക്സിക്യുട്ടീവ് ബസിലായിരുന്നു സംഭവം. ക്ലാസ് കഴിഞ്ഞശേഷം വീട്ടിലേക്കു മടങ്ങുകയായിരുന്നു വിദ്യാര്‍ഥി.

കളത്തിപ്പടിയില്‍നിന്ന് ബസില്‍ കയറിയ വിദ്യാര്‍ഥിയെ ബസ് ജീവനക്കാരൻ അസഭ്യം പറഞ്ഞ് ഇറക്കിവിടുകയായിരുന്നു എന്നാണ് പരാതി. വിദ്യാര്‍ഥി വീട്ടിലെത്തി രക്ഷിതാക്കളോട് പരാതിപ്പെട്ടതോടെ രക്ഷിതാക്കള്‍ പോലീസില്‍ വിവരമറിയിക്കുകയായിരുന്നു. ഈസ്റ്റ് പോലീസ് ബസ് ജീവനക്കാരനെ കസ്റ്റഡിയിലെടുത്തു.