അമിത വേ​ഗതയിലെത്തിയ ഡ്യൂക്ക് ബൈക്ക് ടോറസ് ലോറിയിലേക്ക് ഇടിച്ചുകയറി; അശ്രദ്ധമായും, നിയമലംഘനം നടത്തിയുമുള്ള ബൈക്ക് യാത്ര മൂന്നു യുവാക്കളുടെ ജീവൻ കവർന്നെടുത്തു; കോട്ടയം കുമാരനെല്ലൂരിലെ അപകടത്തിന്റെ ദൃക്സാക്ഷി വിവരങ്ങൾ ഇങ്ങനെ

സ്വന്തം ലേഖകൻ

കോട്ടയം : കുമാരനല്ലൂരിൽ ടിപ്പർ ലോറി ബൈക്കിലിടിച്ച് മൂന്ന് യുവാക്കൾക്ക് മരിച്ച സംഭവത്തിൽ കൂടുതൽ വിവരങ്ങൽ പുറത്ത്. ബൈക്കിൽ യാത്ര ചെയ്ത തിരുവഞ്ചൂർ ,സംക്രാന്തി സ്വദേശികളാണ് മരിച്ചത്. സംക്രാന്തി സ്വദേശി അൽവിൻ, ഫാറൂഖ് ,തിരുവഞ്ചൂർ സ്വദേശി പ്രവീൺ എന്നിവരാണ് മരിച്ചത്.

ബൈക്ക് അമിതവേ​ഗതയിലായിരുന്നുവെന്ന് ദൃക്സാക്ഷികൾ പറയുന്നു. ബൈക്ക് എതിർവശത്ത് കൂടി വന്നിരുന്ന ലോറിയിൽ ഇടിക്കുകയായിരുന്നു. മൂവരും സംഭവ സ്ഥലത്തുതന്നെ മരിച്ചു.

ടോറസ് ലോറിക്കിടിയിലേക്ക് ഡ്യൂക്ക് ബൈക്ക് ഇടിച്ചു കയറിയാണ് അപകടമുണ്ടായത്. ഇന്ന് വൈകുന്നേരം കുമാരനല്ലൂർ കുടയംപടി റോഡിൽ അങ്ങാടി സൂപ്പർ മാർക്കറ്റിന് സമീപത്താണ് അപകടം നടന്നത്.

അപകടത്തിൽ ബൈക്ക് പൂർണമായും തകർന്നു. സംഭവത്തിൽ ഗാന്ധിനഗർ പോലീസ് കേസെടുത്തു.മൃതദേഹങ്ങൾ കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി.