ജാർഖണ്ഡിൽ ഗ്ലൈഡർ വീടിനു മുകളിൽ തകർന്നു വീണു; 14 കാരനും പൈലറ്റിനും പരിക്ക്; ഒഴിവായത് വൻ ദുരന്തം

റാഞ്ചി: ജാർഖണ്ഡിൽ പറന്നുയർന്ന് മിനിറ്റുകൾക്കകം ഗ്ലൈഡർ വീടിനു മുകളിൽ തകർന്നുവീണു. ധൻബാദിലെ ബിർസ മുണ്ട പാർക്കിനു സമീപം നടന്ന അപകടത്തിൽ പൈലറ്റിനും പതിനാലു വയസ്സുകാരനായ യാത്രക്കാരനും അതീവ ഗുരുതരമായി പരുക്കേറ്റു. ഇവർ ആശുപത്രിയിൽ ചികിത്സയിലാണ്. അപകടത്തിന്റെ ദൃശ്യങ്ങൾ സമൂഹ മാധ്യമങ്ങളിൽ പ്രചരിക്കുന്നുണ്ട്.

പട്ന സ്വദേശിയായ കുഷ് സിങ് എന്ന കുട്ടി ധൻബാദിൽ ബന്ധുവീട്ടിൽ എത്തിയതായിരുന്നു. അവിടെയുള്ളൊരു ബന്ധുവാണ് കുട്ടിയെ ഗ്ലൈഡർ യാത്രക്കായി കൊണ്ടുവന്നത്. പൈലറ്റിനെ കൂടാതെ ഒരാൾക്ക് മാത്രം യാത്ര ചെയ്യാനാകുന്നതാണ് ഗ്ലൈഡർ. ബാർവാദ എയർസ്ട്രിപ്പിൽ നിന്ന് പറന്നുയർന്ന ഗ്ലൈഡർ പെട്ടന്ന് നിയന്ത്രണം വിടുകയും 500 മീറ്റർ അകലെയുള്ള വീട്ടിലെ തൂണിൽ ഇടിക്കുകയുമായിരുന്നു. അപകടത്തിൽ കോക്പിറ് പൂർണമായും തകർന്നത് പ്രചരിക്കുന്ന വിഡിയോയിൽ കാണാവുന്നതാണ്. വ്യാഴാഴ്ച വൈകിട്ട് 4.50 ഓടെയായിരുന്നു സംഭവം.

നിലേഷ് കുമാർ എന്നയാളുടെ വീട്ടിലേക്കാണ് ഗ്ലൈഡർ ഇടിച്ചു കയറിയത്. കുടുംബത്തിലെ ആർക്കും പരിക്കുകളിലെന്നും ഒഴിവായത് വൻ ദുരന്തമാണെന്നും നിലേഷ് പറഞ്ഞു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.