ഇനി കെഎസ്ആർടിസിയും ഗൂ​ഗിൾ മാപ്പ് നോക്കിയാൽ എപ്പോൾ വരും എന്നറിയാം; പരീക്ഷണാടിസ്ഥാനത്തിൽ തിരുവനന്തപുരം ന​ഗരത്തിലെ സിറ്റി സർക്കുലർ സർവീസുകളുടെ വിവരങ്ങൾ ​ഗൂ​ഗിൾ മാപ്പിൽ ഉൾപ്പെടുത്തി

സ്വന്തം ലേഖകൻ

തിരുവനന്തപുരം; ​കെഎസ്ആർടിസ് ബസ് സർവീസുകളുടെ റൂട്ടും സമയവും ഗൂ​ഗിൾ മാപ്പ് നോക്കിയറിയാം. പരീക്ഷണാടിസ്ഥാനത്തിൽ തിരുവനന്തപുരം ന​ഗരത്തിലെ സിറ്റി സർക്കുലർ സർവീസുകളുടെ വിവരങ്ങൾ ​ഗൂ​ഗിൾ മാപ്പിൽ ഉൾപ്പെടുത്തി.

സിറ്റി സർക്കുലർ സർവീസുകളുടെ വിവരം പൂർണമായും ഉൾപ്പെടുത്തിയ ശേഷമാകും ദീർഘദൂര സ്വിഫ്റ്റ് സർവീസുകളുടെ വിവരങ്ങളും എത്തുക. ​ഗൂ​ഗിൾ മാപ്പിൽ പബ്ലിക് ട്രാൻസ്പോർട്ടിലാണ് ഇത് ലഭ്യമാകുക. പോകേണ്ട സ്ഥലം നൽകിയാൽ പെട്ടെന്ന് വിവരങ്ങൾ ലഭിക്കും. പിന്നീട് മുഴുവൻ കെഎസ്ആർടിസ് ബസ്സുകളുടേയും റൂട്ട് ​ഗൂ​ഗിൾ മാപ്പിൽ എത്തിക്കാനാണ് തീരുമാനം.

ബസ്സുകളിലെ ജിപിഎസ് പ്രവർത്തന സജ്ജമാകുന്നതോടെ ബസ് എവിടെയെത്തിയെന്നും മാപ്പിൽ ലഭ്യമാകുമെന്നും സിഎംഡിയും ​ഗതാ​ഗത സെക്രട്ടറിയുമായ ബിജു പ്രഭാകർ പറഞ്ഞു. സ്വിഫ്റ്റിലും ഇത് നടപ്പാകുന്നതോടെ ബസ് എവിടെയെത്തിയെന്ന് മനസിലാക്കി കൃത്യസമയത്ത് ബസ് സ്റ്റോപ്പിൽ എത്താനാവും.

തിരുവനന്തപുരം സിറ്റി സർക്കുലർ സർവീസുകൾ മജന്ത, യെല്ലോ, ​ഗ്രീൻ, ഓറഞ്ച്, റെഡ് തുടങ്ങിയ നിറങ്ങളിലാണ് ക്രമീകരിച്ചിരിക്കുന്നത്.