കോഴിക്കോട്: കോഴിക്കോട് ചാത്തമംഗലം പുളളാവൂര് പുഴയില് സ്ഥാപിച്ച മെസിയുടെയും നെയ്മറിന്റെയും കൂറ്റന് കട്ടൗട്ടുകള് നീക്കം ചെയ്യണമെന്ന് പഞ്ചായത്തിന്റെ നിര്ദേശം.
പുഴയുടെ ഒഴുക്കിന് തടസമാകുന്ന നിലയിലാണ് കട്ടൗട്ടുകള് സ്ഥാപിച്ചതെന്ന് കണ്ടെത്തിയ സാഹചര്യത്തിലാണ് നടപടി. അഭിഭാഷകനായ ശ്രീജിത് പെരുനമന നല്കിയ പരാതിയിലാണ് ചാത്തമംഗലം പഞ്ചായത്ത് ഇത്തരമൊരു നടപടി സ്വീകരിച്ചത്.
ഫാന്സ് അസോസിയേഷനുകള് ഇത് നീക്കിയില്ലെങ്കില് പഞ്ചായത്ത് തന്നെ ഇവ നീക്കം ചെയ്യുമെന്നാണ് മുന്നറിയിപ്പ്. ലോകകപ്പിന്റെ ആവേശത്തില് ഇഷ്ടതാരങ്ങളുടെ മാനം മുട്ടെയുളള കട്ടൗട്ടുകള് മത്സരിച്ച് സ്ഥാപിച്ച അര്ജന്റീന – ബ്രസീല് ആരാധകര്ക്ക് വൻ തിരിച്ചടിയാണ് പഞ്ചായത്തിന്റെ തീരുമാനം.
തിങ്കളാഴ്ച എല്ലാവരുമായും ചര്ച്ച ചെയ്ത് വിഷയത്തില് തീരുമാനം എടുക്കുമെന്ന് പ്രദേശത്തെ ബ്രസീല് ആരാധകര് പറഞ്ഞു. കഴിഞ്ഞ മാസം 30നായിരുന്നു ചാത്തമംഗലത്തെ മെസി ആരാധകര് പുഴയുടെ നടുവില് താരത്തിന്റെ 30 അടി ഉയരമുളള കട്ടൗട്ട് സ്ഥാപിച്ചത്. പിന്നാലെയാണ് പഞ്ചായത്തിലെ ബ്രസീല് ആരാധകര് ഇതിനു സമീപം 35 അടി ഉയരമുളള നെയ്മറുടെ കട്ടൗട്ട് സ്ഥാപിച്ചത്.
Whatsapp Group 1 | Whatsapp Group 2 |Telegram Group