സ്വന്തം ലേഖിക
കൊല്ലം: സംസ്ഥാന പൊലീസ് മേധാവി അനില്കാന്തിന്റെ പേരില് ഓണ്ലൈന് തട്ടിപ്പ്.
അനില് കാന്തിന്റെ പേരില് വ്യാജ വാട്സ് ആപ്പ് അക്കൗണ്ടുണ്ടാക്കി കൊല്ലത്തെ ഒരു അധ്യാപികയില് നിന്നും ഹൈടെക് സംഘം തട്ടിയത് 14 ലക്ഷം രൂപ.
Whatsapp Group 1 | Whatsapp Group 2 |Telegram Group
ഉത്തരേന്ത്യന് ഹൈ- ടെക് ലോബി നടത്തിയ തട്ടിപ്പിനെ കുറിച്ച് പൊലീസ് അന്വേഷണം ആരംഭിച്ചിട്ടുണ്ട്. ഓണ്ലൈന് ലോട്ടറി അടിച്ചുവെന്ന് പറഞ്ഞുവന്ന സന്ദേശമാണ് കൊല്ലം കുണ്ടറ സ്വദേശിയായ അധ്യാപികക്ക് ആദ്യം ലഭിക്കുന്നത്.
സമ്മാനത്തുക നല്കുന്നതിന് മുൻപ് നികുതി അടയ്ക്കാനുള്ള പണം കമ്പനിക്ക് നല്കണമെന്ന് ഹൈ ടെക് സംഘം സന്ദേശമയച്ചു. സംശയം തോന്നിയ അധ്യാപിക തിരിച്ചു സന്ദേശമയച്ചപ്പോള് പിന്നെയെത്തിയത് ഡിജിപിയുടെ സന്ദേശമാണ്.
ടാക്സ് അടയ്ക്കണമെന്നും അല്ലെങ്കില് നിയമ നടപടി നേരിടുമെന്നും ഡിജിപിയുടെ ചിത്രം വച്ച് വാട്സ് ആപ്പ് സന്ദേശത്തില് പറഞ്ഞു. ഡിജിപിയുടെ പേരിലുള്ള സന്ദേശത്തില് താന് ഇപ്പോള് ഡൽഹിയിലാണെന്നും അറിയിച്ചു.
സംശയം തീക്കാന് അധ്യാപിക പൊലീസ് ആസ്ഥാനത്തേക്ക് വിളിച്ചു. അന്ന് ഡിജിപി ഡൽഹിയിലേക്ക് പോയെന്ന മറുപടി ലഭിച്ചപ്പോള് സന്ദേശമയക്കുന്നത് ഡിജിപിയാണെന്ന് ഉറപ്പിച്ച അധ്യാപിക ഹെടെക്ക് സംഘത്തിന്റെ വലയില് കുരുങ്ങുകയായിരുന്നു. അസം സ്വദേശിയുടെ പേരിലെടുത്ത ഒരു നമ്പറില് നിന്നാണ് വ്യാജ വാട്സ് ആപ്പ് അക്കൗണ്ടുണ്ടാക്കി തട്ടിപ്പ് നടത്തിയെന്ന് ഹൈ ടെക് സെല്ലിന്റെ അന്വേഷണത്തില് കണ്ടെത്തി.
പൊലീസുദ്യോഗസ്ഥരുടെ പേരില് വാട്സ് ആപ്പ് മുഖേനയും വ്യാജ ഫെയ്സ്ബുക്ക് അക്കൗണ്ടുണ്ടാക്കിയും നേരത്തെയും തട്ടിപ്പ് സംഘങ്ങള് പണം തട്ടിയിട്ടുണ്ട്.
സൈബര് തട്ടിപ്പില് ജാഗ്രത പുലത്തണമെന്ന് പൊലീസ് ജനങ്ങള്ക്ക് നിര്ദ്ദേശം നല്കുമ്പോഴാണ് സംസ്ഥാന പൊലീസ് മേധാവിയുടെ പേരില് തന്നെ ഇപ്പോള് തട്ടിപ്പ് നടത്തിയിരിക്കുന്നത്. തട്ടിപ്പു സംഘത്തിനു വേണ്ടി പൊലീസ് അന്വേഷണം തുടങ്ങിയിട്ടുണ്ട്.
