വിവാഹ വാഗ്ദാനം നല്കി കോട്ടയം റെയിൽവേ സ്റ്റേഷന് സമീപമുള്ള സാഫാ ടൂറിസ്റ്റ് ഹോമിൽ എത്തിച്ച് യുവതിയെ ബലാൽസംഗം ചെയ്ത സംഭവം; പ്രതിക്ക് ഏഴ് വർഷം കഠിന തടവും പിഴയും

സ്വന്തം ലേഖകൻ

കോട്ടയം: വിവാഹ വാഗ് ദാനം നൽകി മോനിപ്പള്ളി സ്വദേശിയായ യുവതിയെ കോട്ടയം റെയിൽവേ സ്റ്റേഷന് സമീപമുള്ള സാഫാ ടൂറിസ്റ്റ് ഹോമിൽ എത്തിച്ച് ബലാൽസംഗം ചെയ്ത പ്രതി കൊല്ലം പറവൂർ തെക്കുംഭാഗത്ത് ആണ് വീട്ടിൽ മുഹമ്മദ് ഹബീബ് സലീമിന് (40) കോട്ടയം അഡീഷണൽ സെഷൻസ് ജഡ്ജി ജി ഗോപകുമാർ 7 വർഷം കഠിന തടവും 50,000 രൂപ പിഴയും ശിക്ഷ വിധിച്ചു.

2015 നവംബർ മാസം 29-ാം തീയതി ആണ് കേസിന് ആസ്പദമായ സംഭവം.

ആവലാതികാരിയെ മൊബൈൽ ഫോണിലൂടെ പരിചയപ്പെട്ട പ്രതി ഓൺലൈൻ ചാറ്റിങ്ങിലൂടെ പ്രണയം നടിച്ച് ചാറ്റ് ചെയ്ത് കോട്ടയത്ത് വിളിച്ചുവരുത്തി ടൂറിസ്റ്റ് ഹോമിൽ കൊണ്ടുപോയി പീഡിപ്പിച്ചു എന്നായിരുന്നു കേസ്.

കോട്ടയം ഈസ്റ്റ് പോലീസ് സ്റ്റേഷൻ സർക്കിൾ ഇൻസ്പെക്ടർ ആയിരുന്ന എ.ജെ തോമസ് അന്വേഷണം നടത്തി അനീഷ് വി.കോര കുറ്റപത്രം നൽകിയ കേസിൽ പ്രോസിക്യൂഷനു വേണ്ടി അഡീഷണൽ പബ്ലിക് പ്രോസിക്യൂട്ടർ സതീഷ് ആർ നായർ ഹാജരായി.