സുരക്ഷിത വ്യാവസായിക രീതികൾക്കുള്ള സംസ്ഥാന സർക്കാർ അംഗീകാരം മാൻ കാൻകോറിന്

സ്വന്തം ലേഖകൻ

കൊച്ചി:കേരള സർക്കാരിന്റെ കീഴിലുള്ള ഫാക്ടറീസ് ആൻഡ് ബോയിലർ വകുപ്പിന്റെ 2020-ലെ സേഫ് ഇൻഡസ്ട്രിയൽ പ്രാക്ടീസസ് അവാർഡിന് ആഗോള സ്പൈസ് എക്സ്ട്രാക്ട് വിപണിയിലെ പ്രമുഖ കമ്പനികളിൽ ഒന്നായ കൊച്ചി ആസ്ഥാനമായ മാൻ കാൻകോർ അർഹമായി.

കമ്പനിയുടെ അങ്കമാലിയിലെ ഫാക്ടറിക്കാണ് അവാർഡ് ലഭിച്ചത്. തിരുവനന്തപുരത്ത് നടന്ന ചടങ്ങിൽ മന്ത്രി വി. ശിവൻകുട്ടി അവാർഡ് സമ്മാനിച്ചു. മാൻ കാൻകോർ അസോസിയേറ്റ് ഹെഡ്- പ്രൊഡക്ഷൻ ജയമോഹൻ സി, സീനിയർ അസോസിയേറ്റ്- എച്ച്എസ്ഇ മുഹമ്മദ് റാഫി കെ.യു, സീനിയർ അസോസിയേറ്റ്- സെക്യൂറിറ്റി ഉസ്മോൻ ലമ്പ എന്നിവർ മന്ത്രിയിൽ നിന്നും അവാർഡ് ഏറ്റുവാങ്ങി.

ജീവനക്കാർക്ക് സുരക്ഷിത തൊഴിലിടം സൃഷ്ടിക്കുന്നതിന് നിരന്തരമായി ആവശ്യമായ നടപടികൾ സ്വീകരിക്കുന്ന കമ്പനി എന്ന നിലയ്ക്ക് ഈ അംഗീകാരം ഏറെ സന്തോഷം പകരുന്നതാണെന്ന് മാൻ കാൻകോർ സിഇഒയും എക്സിക്യുട്ടിവ് ഡയറക്ടറുമായ ജീമോൻ കോര പറഞ്ഞു. തുടർച്ചയായ രണ്ടാം തവണയാണ് കമ്പനി ഈ അംഗീകാരം നേടുന്നത്.