ദ്വയാര്‍ത്ഥ ചോദ്യങ്ങളുമായി വീണ്ടുമെത്തി; ഒഴിഞ്ഞ് മാറാന്‍ ശ്രമിച്ച വിദ്യാര്‍ത്ഥിനിയെ തടഞ്ഞ് നിര്‍ത്തി; യൂ ട്യൂബറും ഓട്ടോക്കാരുമായി സംഘര്‍ഷം; മൂന്ന് ഓട്ടോ തൊഴിലാളികള്‍ക്ക് പരിക്ക്
സ്വന്തം ലേഖിക
കൊച്ചി: ആലുവ മെട്രോ സ്റ്റേഷനടുത്ത് ചോദ്യവുമായെത്തിയ യൂട്യൂബറും ഓട്ടോക്കാരും തമ്മില്‍ വീണ്ടും സംഘര്‍ഷം.
വനിത യൂട്യൂബറോടൊപ്പമുണ്ടായിരുന്ന രണ്ട് പേര്‍ ഓട്ടോ തൊഴിലാളികളെ മര്‍ദിച്ചതായി പരാതി ഉയര്‍ന്നു. പരിക്കേറ്റ മൂന്ന് ഓട്ടോ തൊഴിലാളികള്‍ ജില്ലാ ആശുപത്രിയില്‍ ചികിത്സ തേടി.
Whatsapp Group 1 | Whatsapp Group 2 |Telegram Group
ആലുവ മെട്രോ സ്റ്റേഷനിലെത്തിയ വനിതാ യൂട്യൂബര്‍ ഇന്നും യാത്രക്കാരോട് ദ്വയാര്‍ത്ഥ ചോദ്യങ്ങള്‍ ചോദിച്ചിരുന്നു. ഇവരുടെ ചോദ്യത്തില്‍ നിന്ന് ഒഴിഞ്ഞ് മാറാന്‍ ശ്രമിച്ച വിദ്യാര്‍ത്ഥിനിയെ നിര്‍ബന്ധിച്ച്‌ തടഞ്ഞ് നിര്‍ത്തിയതോടെയാണ് വീണ്ടും ഓട്ടോക്കാര്‍ ഇടപെട്ടത്.
ഇതോടെ യൂട്യൂബറുടെ കൂടെയുണ്ടായിരുന്ന ആണ്‍ സുഹൃത്തുക്കള്‍ ഓട്ടോക്കാരെ മര്‍ദിക്കുകയായിരുന്നുവെന്നാണ് പരാതി.
ഓട്ടോ തൊഴിലാളികളായ സനോജ് ഇ.എസ്, സിദ്ദീഖ് കെ.എ. അബി എ.ജി എന്നിവര്‍ ജില്ലാ ആശുപത്രിയില്‍ ചികിത്സ തേടി. യൂ ട്യൂബറുടെ സംഘം
മദ്യപിച്ചിട്ടുണ്ടെന്ന പരാതിയെ തുടര്‍ന്ന് ഇവരെ പൊലീസ് മെഡിക്കല്‍ പരിശോധനയ്ക്ക് വിധേയരാക്കി.
രണ്ടാഴ്ച മുൻപ് വിദ്യാര്‍ത്ഥിനികളോട് അശ്ലീല ചോദ്യം ചോദിച്ച യൂട്യൂബറെ ആലുവ മെട്രോ സ്റ്റേഷനിലെ ഓട്ടോ തൊഴിലാളികള്‍ ചോദ്യം ചെയ്തിരുന്നു. ഈ വീഡിയോ വൈറലായതോടെ തൊട്ടടുത്ത ദിവസങ്ങളിലും ചോദ്യങ്ങളുമായെത്തി തങ്ങളെ പ്രകോപിപ്പിക്കാന്‍ ശ്രമിച്ചിരുന്നതായി ഓട്ടോക്കാര്‍ പറയുന്നു.
