പാലക്കാട്: നെല്ലിയാമ്പതിയിലേക്കുള്ള വിനോദയാത്രയ്ക്കിടെ സുഹൃത്തിനെ ജീപ്പില് നിന്ന് തള്ളിയിട്ട് പരിക്കേല്പ്പിച്ച സംഭവത്തില് ഒരാളെ പാടഗിരി പൊലീസ് അറസ്റ്റ് ചെയ്തു.
തൃശ്ശൂർ അരിമ്പൂർ സ്വദേശിയായ റിതുലിനെയാണ് (34) എസ്.എച്ച്.ഒ. പി. അരുണ്ദാസിന്റെ നേതൃത്വത്തിലുള്ള സംഘം പിടികൂടിയത്.
ആക്രമണത്തില് തലയ്ക്ക് ഗുരുതരമായി പരിക്കേറ്റ ജെയിംസ് (46) നിലവില് അബോധാവസ്ഥയില് ചികിത്സയിലാണ്. ജനുവരി 25-ന് ലോട്ടറി അടിച്ചതിന്റെ ആഘോഷത്തിനായി ഒൻപതംഗ സംഘം നടത്തിയ യാത്രയ്ക്കിടെയാണ് സംഭവം നടന്നത്.
Whatsapp Group 1 | Whatsapp Group 2 |Telegram Group
മദ്യപാനത്തിനിടെ ഉണ്ടായ തർക്കത്തെത്തുടർന്ന് നൂറടി ഭാഗത്തുവെച്ച് റിതുല് ജെയിംസിനെ ജീപ്പില് നിന്ന് തള്ളിയിടുകയായിരുന്നുവെന്ന് പൊലീസ് പറഞ്ഞു.
പരിക്കേറ്റ വിവരം വീട്ടുകാരില് നിന്ന് മറച്ചുവെക്കാനും പരസ്പരവിരുദ്ധമായ മൊഴികള് നല്കാനും സുഹൃത്തുക്കള് ശ്രമിച്ചിരുന്നു. ഇതേത്തുടർന്ന് ജെയിംസിന്റെ കുടുംബം നല്കിയ പരാതിയില് കാഞ്ഞാണിയിലെ ബസ് തൊഴിലാളി സഹായസമിതി ഓഫീസിലെത്തി പൊലീസ് നടത്തിയ അന്വേഷണത്തിലാണ് സത്യം പുറത്തുവന്നത്.
