കോട്ടയം ജില്ലാ പോലീസിന്റെ നേതൃത്വത്തിൽ ലഹരിക്കെതിരെ ചിത്രരചനാ ക്യാമ്പയിൻ; ജില്ലാ പോലീസ് മേധാവി കെ.കാർത്തിക് ഉത്‌ഘാടനം ചെയ്തു
കോട്ടയം: സ്കൂൾ,കോളേജ് വിദ്യാർത്ഥികളെ പങ്കെടുപ്പിച്ചുകൊണ്ട് യോദ്ധാവ് ലഹരി വിരുദ്ധ ക്യാമ്പയിന്റെ ഭാഗമായി കോട്ടയം ജില്ലാ പോലീസിന്റെ നേതൃത്വത്തിൽ കോട്ടയം കളക്ടറേറ്റ് കവാടത്തിൽ വലിയ കാൻവാസിൽ കാരിക്കേച്ചർ/ചിത്രരചനാ ക്യാമ്പയിൻ സംഘടിപ്പിച്ചു. പരിപാടിയുടെ ഉദ്ഘാടനം രാവിലെ 11 മണിക്ക് കോട്ടയം ജില്ലാ പോലീസ് മേധാവി കെ.കാർത്തിക് ഐ.പി.എസ് നിർവഹിച്ചു. നമ്മുടെ സമൂഹം നേരിടുന്ന പ്രധാന വെല്ലുവിളിയാണ് മയക്കുമരുന്നിന്റെ ഉപയോഗം. ഇത് തടയുന്നതിന് സർക്കാർ സംവിധാനങ്ങൾ ഏർപ്പെടുത്തിയിട്ടുണ്ടെങ്കിലും പൊതുജന പങ്കാളിത്തത്തോടുകൂടി മാത്രമേ നമുക്ക് ഈ വിപത്തിനെ തുടച്ചുനീക്കാൻ കഴിയുകയുള്ളൂ. നമ്മുടെ രാജ്യത്തിന്റെ ഭാവി കുട്ടികളിലാണ് . മയക്കുമരുന്നിനെതിരെയുള്ള അവബോധം കുട്ടികളിൽ നിന്നാണ് നാം തുടങ്ങേണ്ടത്. എങ്കിൽ മാത്രമേ സുന്ദരമായ ഒരു തലമുറയെ നമുക്ക് വാർത്തെടുക്കാൻ കഴിയുകയുള്ളൂ എന്നും ജില്ലാ പോലീസ് മേധാവി പറഞ്ഞു.
ചടങ്ങില്‍ ജില്ലാ പൊലീസ് മേധാവി കെ. കാർത്തിക് ഐ. പി എസ് ,സ്പെഷ്യൽ ബ്രാഞ്ച് ഡി വൈ എസ് പി രാജീവ് ,ഡിസിആർബി ഡി വൈ എസ് പി അനീഷ് വി കോര , നർക്കോട്ടിക് സെൽ ഡി വൈ എസ് പി ജോൺ,വെസ്റ്റ് എസ് എച്ച് ഒ അനൂപ് കൃഷ്ണ, ഈസ്റ്റ് എസ് എച്ച് ഒ യു ശ്രീജിത്ത്, വെസ്റ്റ് എസ് ഐ ടി ശ്രീജിത്ത്, ഈസ്റ്റ് എസ് ഐ അനുരാജ്,ജനപ്രതിനിധികള്‍ ,അദ്ധ്യാപകര്‍, തുടങ്ങിയവരും പങ്കെടുത്തു.
