തിരുവനന്തപുരം: ബംഗാള്‍ ഉള്‍ക്കടലില്‍ വീണ്ടും ന്യൂനമര്‍ദ്ദം രൂപപ്പെട്ടതായി കേന്ദ്ര കാലാവസ്ഥ വകുപ്പ്.
തെക്കന്‍ ഒഡീഷ തീരത്തിനും, വടക്കന്‍ ആന്ധ്രാപ്രദേശ് തീരത്തിനും സമീപമായി മധ്യ പടിഞ്ഞാറന്‍ ഉള്‍ക്കടല്‍, വടക്കുപടിഞ്ഞാറന്‍ ബംഗാള്‍ ഉള്‍ക്കടല്‍ എന്നിവയ്ക്ക് മുകളിലായാണ് ന്യൂനമര്‍ദ്ദം രൂപപ്പെട്ടത്.
എന്നാല്‍ കേരളത്തില്‍ അതിശക്തമായ മഴയ്ക്ക് സാധ്യതയുണ്ടെന്ന് മുന്നറിയിപ്പില്‍ പറയുന്നില്ല. സംസ്ഥാനത്ത് അടുത്ത അഞ്ച് ദിവസം നേരിയതോ ഇടത്തരമായതോ ആയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് വ്യക്തമാക്കി.
നിലവില്‍ ഒരു ജില്ലയിലും അലര്‍ട്ടുകള്‍ പുറപ്പെടുവിച്ചിട്ടില്ല. സെപ്റ്റംബര്‍ 16 വരെയുള്ള മഴ മുന്നറിയിപ്പുകളാണ് നിലവില്‍ പുറത്തിറക്കിയിട്ടുള്ളത്.
സെപ്റ്റംബര്‍ 16 വരെ എല്ലാ ജില്ലയിലും ഗ്രീന്‍ അലര്‍ട്ടാണ്. നേരിയ/മിതമായ മഴയ്ക്കുള്ള സാധ്യതയാണ് എല്ലാ ജില്ലയിലും അന്ന് വരെ പ്രവചിച്ചിട്ടുള്ളത്.