കോട്ടയം: എക്സൈസും പോലീസും രാസലഹരിക്ക് പിന്നാലെ പോകുമ്പോൾ വിദേശ ബ്രാൻഡുകളുടെ പേരില്‍ വ്യാജ സിഗരറ്റു വിൽപ്പന വ്യാപകമായി. കോട്ടയം ജില്ലയുടെ വിവിധ പ്രദേശങ്ങളിൽ വൻതോതിൽ സിഗരറ്റ് വില്‍പ്പന കൊഴുക്കുന്നു.
പുകയിൽ അൽപ്പം ലഹരിയും അടങ്ങിയിട്ടുണ്ടന്ന് പറയുന്നു. ഒരിക്കൽ ഉപയോഗിക്കുന്നവർ വീണ്ടും വാങ്ങാൻ താൽപര്യപ്പെടുന്നു.
പരിശോധന ലഹരിമാഫിയകളിലേയ്ക്ക് ഒതുങ്ങിയതോടെയാണ് സിഗരറ്റ് മാഫിയ രംഗത്തെത്തിയത്. പഴങ്ങളുടേയും കറികളുടേയും രുചിയുള്ള സിഗരറ്റ് വരെ വില്‍പ്പനയ്ക്ക് എത്തുന്നു എന്നതാണ് ഇതിന്റെ പ്രത്യേകത.
നിലവാരം കുറഞ്ഞ പുകയിലയില്‍ നിർമിക്കുന്ന സിഗരറ്റുകള്‍ നികുതിയടയ്ക്കാതെയും നിയമാനുസൃത മുന്നറിയിപ്പുകളില്ലാതെയുമാണ് വില്‍പ്പന. ഗള്‍ഫ് രാജ്യങ്ങളിലെ വിലകൂടിയ സിഗരറ്റ് എന്ന് തെറ്റിദ്ധരിച്ചാണ് ആളുകള്‍ വാങ്ങുന്നത്. വിദേശത്ത് ഉത്പാദിപ്പിച്ച്‌ കൊച്ചി വഴി എത്തിച്ചാണ് ജില്ലയിലെ വില്‍പ്പന.
Whatsapp Group 1 | Whatsapp Group 2 |Telegram Group
പ്രമുഖ വിദേശ ബ്രാൻഡഡ് കമ്പനികളുടെ സിഗരറ്റുകളെന്ന് തോന്നിക്കും വിധം പാക്ക് ചെയ്ത് പേരില്‍ ചെറിയ മാറ്റം വരുത്തും. സിഗരറ്റുകളില്‍ ഉപയോഗിക്കുന്ന പുകയിലയുടെ പരമാവധി ഉപയോഗ കാലയളവ് രണ്ട് മാസമാണ്. അതിനാല്‍ സിഗരറ്റ് പായ്ക്കറ്റില്‍ അവയുടെ നിർമാണ തീയതിയും ഉപയോഗ കാലയളവും നിർമിച്ച കേന്ദ്രവും ഉള്‍പ്പെടെ രേഖപ്പെടുത്തണം. വ്യാജനില്‍ വിലയോ നിർമാണ തീയതിയോ നിർമിച്ച സ്ഥലത്തിന്റെ വിവരങ്ങളോ ഉണ്ടാകില്ല. കാലാവധി കഴിഞ്ഞ പുകയിലയായതിനാല്‍ വലിയ ആരോഗ്യ പ്രശ്നങ്ങളുമുണ്ടാക്കും.
നികുതിയട‌യ്‌ക്കുന്നില്ല, കൊള്ളലാഭം
സാധരണ സിഗരറ്റിന് ഒരു രൂപയില്‍ താഴെ ലാഭമുള്ളപ്പോള്‍ വ്യാജന് 5 മുതല്‍ 10 രൂപവരെയാണ് ലാഭം. സാധാരണ സിഗരറ്റ് 73% നികുതിയുള്ളപ്പോള്‍ വ്യാജന് നികുതിയമില്ല. ആരോഗ്യ പ്രശ്നം കൂടുതലുമാണ്.
എക്‌സൈസ് നികുതി അടയ്ക്കാതെ വില്‍ക്കുന്ന പുകയില ഉത്പന്നങ്ങള്‍ എന്ന നിലയില്‍ എക്‌സൈസ് വകുപ്പിന് അനധികൃത സിഗരറ്റ് കച്ചവടം തടയാനും കേസെടുക്കാനും അധികാരമുണ്ട്. വില, നിർമാണ വിവരങ്ങള്‍ തുടങ്ങിയവ രേഖപ്പെടുത്താതെ വില്‍ക്കുന്നതിനാല്‍ ലീഗല്‍ മെട്രോളജി വകുപ്പിനും കള്ളക്കടത്തു സാധനങ്ങളായതിനാല്‍ പൊലീസിനും പരിശോധന നടത്തി കേസെടുക്കാം.
പക്ഷേ അവരും അറിഞ്ഞ ഭാവമില്ല.
