സ്വന്തം ലേഖകൻ
പാരീസ്: പാരീസ് ഒളിമ്പിക്സ് ഗുസ്തിയില് ഫൈനലിന് മുന്നോടിയായുള്ള ഭാരപരിശോധനയില് പരാജയപ്പെട്ട് അയോഗ്യയായ സംഭവത്തിൽ വിനേഷ് ഫോഗട്ട് അപ്പീൽ നൽകി. കായിക തർക്ക പരിഹാര കോടതിയിലാണ് അപ്പീൽ നൽകിയത്. വെള്ളി മെഡല് പങ്കിടണമെന്ന ആവശ്യമാണ് ഫോഗട്ട് അപ്പീലില് ഉന്നയിച്ചത്. ഇത് സംബന്ധിച്ച് വ്യാഴാഴ്ച രാവിലെ ഇടക്കാല ഉത്തരവുണ്ടായേക്കും. കായിക തർക്ക പരിഹാര കോടതി വിനേഷ് ഫോഗട്ടിന് അനുകൂലമായി വിധി പ്രസ്താവിച്ചാല് ഒളിമ്പിക് കമ്മിറ്റിക്ക് വെള്ളി മെഡല് രണ്ടുപേര്ക്ക് നല്കേണ്ടതായി വരും.
സ്വര്ണ മെഡലിനായി ഫൈനലില് മത്സരിക്കാന് തയ്യാറെടുക്കുന്നതിനിടെയാണ് വിനേഷ് ഫോഗട്ട് അയോഗ്യയായത്. അനുവദനീയമായതിനേക്കാള് 100 ഗ്രാം ഭാരം അധികമാണെന്ന് കണ്ടെത്തിയതിനെ തുടര്ന്നാണ് വിനേഷ് ഫോഗട്ടിനെ അയോഗ്യയാക്കിയത്. ബുധനാഴ്ച രാത്രി പതിനൊന്നരയ്ക്ക് നടക്കേണ്ട ഫൈനലില് അമേരിക്കയുടെ സാറാ ഹില്ഡ്ബ്രാണ്ടുമായാണ് ഏറ്റുമുട്ടേണ്ടിയിരുന്നത്.
Whatsapp Group 1 | Whatsapp Group 2 |Telegram Group
50 കിലോ ഗ്രാം ഫ്രീസ്റ്റൈല് വിഭാഗം പ്രീ ക്വാര്ട്ടറില് നിലവിലെ ഒളിമ്പിക് ചാമ്പ്യനും നാലുവട്ടം ലോകചാമ്പ്യനുമായ ജപ്പാന്റെ യുയി സുസാകിയെ അട്ടിമറിച്ചാണ് വിനേഷ് ഒളിമ്പിക്സിലെ പോരാട്ടത്തിനു തുടക്കമിട്ടത്. ക്വാര്ട്ടറില് മുന് യൂറോപ്യന് ചാമ്പ്യനായ ഒക്സാന ലിവാച്ചിനെ കീഴടക്കി. സെമി ഫൈനലില് ക്യൂബയുടെ യുസ്നൈലിസ് ഗുസ്മാന് ലോപ്പസിനെ കീഴടക്കിയാണ് ഫൈനല് പോരാട്ടത്തിന് അര്ഹത നേടിയത് (5-0).
