കോട്ടയം: വിവര- പൊതുജന സമ്പർക്ക വകുപ്പിന്റെയും ജില്ലാഭരണകേന്ദ്രത്തിന്റെയും വിവിധ വകുപ്പുകളുടെയും ആഭിമുഖ്യത്തില്‍ നടത്തിയ വായന മാസാചരണം സമാപിച്ചു.
സമാപന സമ്മേളന ഉദ്ഘാടനവും പുസ്തക പരേഡ് മത്സര വിജയികള്‍ക്കുള്ള സമ്മാനവിതരണവും മറിയപ്പള്ളി അക്ഷരം മ്യൂസിയത്തില്‍ ജില്ലാ കളക്ടർ ജോണ്‍ വി. സാമുവല്‍ നിർവ്വഹിച്ചു.
വായന ഡിജിറ്റല്‍ രൂപത്തിലേക്ക് മാറിയതോടെ അറിവുതേടി അലയേണ്ട കാര്യമില്ല ഇപ്പോള്‍. ഡിജിറ്റല്‍ യുഗത്തിലെ വായന മോശമായി ചിത്രീകരിക്കരുത്. അതിഷ്ടപ്പെടുന്നവർ അങ്ങനെ തന്നെ വായിക്കട്ടെ. വായനയ്ക്ക് അവസാനം വന്നിട്ടില്ലെന്നും ജില്ലാ കളക്ടർ പറഞ്ഞു. ഐ.പി.ആർ.ഡി. റീജണല്‍ ഡെപ്യൂട്ടി ഡയറക്ടർ കെ.ആർ. പ്രമോദ് കുമാർ ആധ്യക്ഷ്യം വഹിച്ചു.
എസ്.പി.സി.എസ്. ഭരണസമിതിയംഗം ഡോ. എം.ജി. ബാബുജി മുഖ്യപ്രഭാഷണം നടത്തി. ജില്ലാ ഇൻഫർമേഷൻ ഓഫീസർ എ. അരുണ്‍ കുമാർ, സാക്ഷരതാമിഷൻ ജില്ലാ കോ-ഓർഡിനേറ്റർ ഡോ. വി.വി. മാത്യു, അക്ഷരം മ്യൂസിയം സ്പെഷല്‍ ഓഫീസർ എസ്. സന്തോഷ് കുമാർ എന്നിവർ പ്രസംഗിച്ചു.
Whatsapp Group 1 | Whatsapp Group 2 |Telegram Group
വായനമാസാചരണത്തിന്റെ ഭാഗമായി സ്‌കൂള്‍, കോളജ് വിദ്യാർഥികള്‍ക്കായി നടത്തിയ പുസ്തക പരേഡ് പുസ്തകാസ്വാദന മത്സരത്തിലെ വിജയികളായ ലിയ സച്ചിൻ(സെന്റ് ആന്റണീസ് എച്ച്‌.എസ്.എസ്. പ്ലാശനാല്‍), സാറാ മരിയ ജോബി(സെന്റ് ആന്റണീസ് എച്ച്‌.എസ്. കടപ്ലാമറ്റം), എമ്മ അന്ന ചെറിയാൻ (സെന്റ് ആന്റണീസ് പബ്ലിക് സ്‌കൂള്‍, ആനക്കല്ല്, കാഞ്ഞിരപ്പള്ളി),
ശില്‍പ അന്ന സാം (സി.എം.എസ്. കോളജ് ഹയർ സെക്കൻഡറി സ്‌കൂള്‍, കോട്ടയം), നെവിൻ പ്രമോദ് ( സെന്റ് എഫ്രേംസ് ഹയർ സെക്കൻഡറി സ്‌കൂള്‍, മാന്നാനം), നിബിൻ ഷെറഫ് (എം.ഡി. സെമിനാരി ഹയർ സെക്കൻഡറി സ്‌കൂള്‍, കോട്ടയം),
ദേവിക ആർ. ചന്ദ്രൻ (സ്‌കൂള്‍ ഓഫ് ലെറ്റേഴ്‌സ്, എം.ജി. സർവകലാശാല, കോട്ടയം), അനുപ്രിയ ജോജോ (ദേവമാതാ കോളജ്, കുറവിലങ്ങാട്), എച്ച്‌. ഹരിത (കെ.ജി. കോളജ്, പാമ്പാടി) എന്നിവർ ജില്ലാ കളക്ടർ ജോണ്‍ വി. സാമുവലില്‍ നിന്ന് പുരസ്‌കാരങ്ങള്‍ ഏറ്റുവാങ്ങി.
