പാലക്കാട് : ആള്ക്കൂട്ടമര്ദനത്തിനിരയായി പാലക്കാട് ഛത്തീസ്ഗഢ് സ്വദേശിയായ രാം നാരായൺ (31) കൊല്ലപ്പെട്ട സംഭവത്തില് പ്രതിഷേധവുമായി കുടുംബം. കൊലപാതകത്തില് എസ് സി എസ്ടി അതിക്രമ നിരോധന നിയമപ്രകാരവും, ആള്ക്കൂട്ട ആക്രമണം സംബന്ധിച്ച വകുപ്പുകള് പ്രകാരം കേസെടുക്കണമെന്നും 25 ലക്ഷം രൂപ നഷ്ടപരിഹാരം നല്കണമെന്നും കൊല്ലപ്പെട്ട രാം നാരായണന്റെ കുടുംബം ആവശ്യപ്പെട്ടു.
ആവശ്യങ്ങള് അംഗീകരിക്കും വരെ മൃതദേഹം ഏറ്റെടുക്കില്ല. നടപടി ഉണ്ടാകും വരെ കേരളത്തില് തുടരുമെന്നും കുടുംബം പറഞ്ഞു.
ഇക്കഴിഞ്ഞ വ്യാഴാഴ്ചയായിരുന്നു വാളയാര് അട്ടപ്പള്ളത്ത് രാംനാരായണന് അതിക്രൂരമായ ആള്ക്കൂട്ട മര്ദനത്തിനിരയായി മരിക്കുന്നത്. മോഷണക്കുറ്റം ആരോപിച്ച് രാം നാരായണനെ ആള്ക്കൂട്ടം തടഞ്ഞുവച്ച് മര്ദിക്കുകയായിരുന്നു. മര്ദനമേറ്റ് ചോര ഛര്ദിച്ച് കുഴഞ്ഞു വീഴുകയായും പിന്നാലെ മരിക്കുകയുമായിരുന്നു.
Whatsapp Group 1 | Whatsapp Group 2 |Telegram Group
സംഭവത്തില് വാളയാര് അട്ടപ്പള്ളം മാതാളികാട് സ്വദേശികളായ 15 പേരെയാണ് വാളയാര് പോലീസ് കസ്റ്റഡിയിലെടുത്തത്. അഞ്ച് പേരുടെ അറസ്റ്റും രേഖപ്പെടുത്തിയിരുന്നു. അട്ടപ്പള്ളം സ്വദേശികളായ അനു, പ്രസാദ്, മുരളി, അനന്തന്, വിബിന് എന്നിവരാണ് അറസ്റ്റിലായത്. കൂടുതൽ അറസ്റ്റുകൾ ഇന്നോ നാളെയോ ഉണ്ടായേക്കും. കേസില് ക്രൈംബ്രാഞ്ച് പ്രാഥമിക അന്വേഷണം തുടങ്ങിയിട്ടുണ്ട്.
