തിരുവനന്തപുരം: 69-ാമത് ദേശീയ സ്കൂള്‍ ഫുട്ബോള്‍ ടൂർണമെന്റില്‍ സീനിയർ കാറ്റഗറിയില്‍ വിജയകിരീടം സ്വന്തമാക്കിയ കേരള ടീമിനെ അഭിനന്ദിച്ച്‌ മന്ത്രി വി ശിവൻകുട്ടി. ശ്രീനഗറില്‍ വെച്ച്‌ നടന്ന ആവേശകരമായ ഫൈനല്‍ മത്സരത്തില്‍ മേഘാലയയെ എതിരില്ലാത്ത 2 ഗോളുകള്‍ക്ക് പരാജയപ്പെടുത്തിയാണ് കേരളം ഈ നേട്ടം കരസ്ഥമാക്കിയത്.
വിജയത്തിന് ശേഷം കേരള ടീം ക്യാപ്റ്റൻ അദ്വൈത് മന്ത്രി വി ശിവൻകുട്ടിയെ ഫോണില്‍ വിളിച്ച്‌ സന്തോഷം പങ്കുവെച്ചു. ടീമിനെ എല്ലാവരെയും മന്ത്രി അഭിനന്ദിച്ചു. ഈ സംഭാഷണത്തിനിടെയാണ് ടീമിന്റെ തിരികെ നാട്ടിലേക്കുള്ള ട്രെയിൻ ടിക്കറ്റുകള്‍ കണ്‍ഫോം ആകാത്തതിലുള്ള ആശങ്ക ക്യാപ്റ്റൻ മന്ത്രിയെ അറിയിച്ചത്. കൂടാതെ, തങ്ങളെല്ലാവരും വളരെ ക്ഷീണിതരാണെന്നും വിമാനത്തില്‍ യാത്രയൊരുക്കാൻ സാധിക്കുമോ എന്നും ക്യാപ്റ്റൻ അഭ്യർത്ഥിക്കുകയും ചെയ്തു.
പിന്നാലെ കുട്ടികളുടെ ആവശ്യം ഉടൻ തന്നെ പരിഗണിച്ച മന്ത്രി ടീം അംഗങ്ങള്‍ക്ക് വിമാന ടിക്കറ്റ് ബുക്ക് ചെയ്ത് നല്‍കാൻ തൊഴില്‍ വകുപ്പിന് കീഴിലുള്ള ഒഡെപെക്കിന് (ODEPC) നിർദേശം നല്‍കുകയായിരുന്നു. താരങ്ങളുടെ മടക്കയാത്ര സുഗമമാക്കുന്നതിനുള്ള എല്ലാ നടപടികളും സ്വീകരിക്കുമെന്നും മന്ത്രി വി ശിവൻകുട്ടി ഉറപ്പുനല്‍കി.
Whatsapp Group 1 | Whatsapp Group 2 |Telegram Group
ദേശീയ തലത്തില്‍ കേരളത്തിന്റെ അഭിമാനം വാനോളം ഉയർത്തിയ കായിക പ്രതിഭകളെ മന്ത്രി വി ശിവൻകുട്ടി പ്രത്യേകം അഭിനന്ദിച്ചു. കഠിനാധ്വാനത്തിലൂടെയും മികച്ച പ്രകടനത്തിലൂടെയുമാണ് കേരള ടീം ഈ നേട്ടം കൈവരിച്ചതെന്നും, സർക്കാർ എല്ലാവിധ പ്രോത്സാഹനവും പിന്തുണയും നല്‍കി എല്ലാ സമയത്തും ഒപ്പമുണ്ടാകുമെന്നും മന്ത്രി വി ശിവൻകുട്ടി ഉറപ്പുനൽകി.
