തിരുവനന്തപുരം: ലൈംഗികാരോപണത്തെ തുടര്ന്നു പാര്ട്ടിയില് നിന്നു സസ്പെന്ഷന് നേരിടുന്ന യൂത്ത് കോണ്ഗ്രസ് സംസ്ഥാന പ്രസിഡന്റും എം എല് എയുമായ രാഹുല് മാങ്കൂട്ടത്തിലിനെ നിയമസഭാ സമ്മേളനത്തില് പങ്കെടുപ്പിക്കണമെന്ന അഭിപ്രായം കോണ്ഗ്രസ്സില് ശക്തിപ്പെടുന്നു.
പ്രതിപക്ഷ നേതാവ് വി ഡി സതീശന്റെ നിലപാടുകളെ തള്ളിയാണ് ഒരു വിഭാഗം രാഹുലിനെ നിയമസഭയില് എത്തിക്കാന് ശ്രമം തുടങ്ങിയത്.
ആരോപണം ഉയര്ന്ന ഘട്ടത്തില് രാഹുലിനെ സസ്പെന്റ് ചെയ്തപ്പോള്, പാര്ലിമെന്ററി പര്ട്ടിയില് നിന്നു പുറത്താക്കിയെന്നും നിയമസഭാ സമ്മേളനത്തില് പങ്കെടുക്കുന്ന കാര്യത്തില് പാര്ട്ടിക്ക് ഉത്തരവാദിത്തമില്ലെന്നുമായിരുന്നു നേതാക്കള് പറഞ്ഞത്.
എന്നാല് സസ്പെന്റ് ചെയ്യപ്പെട്ട ശേഷം പാര്ട്ടിയില് രാഹുലിന് അനുകൂലമായി നിലപാടു മാറുകയായിരുന്നു. രാഹുലിനെതിരായി നടപടി ആവശ്യപ്പെട്ട വനിതാ നേതാക്കള് ഉള്പ്പെടെയുള്ളവര് രൂക്ഷമായ സൈബര് ആക്രമണം നേരിട്ടതോടെ നിശ്ശബ്ദരായി.
Whatsapp Group 1 | Whatsapp Group 2 |Telegram Group
രാഹുലിനു പകരം യൂത്ത് കോണ്ഗ്രസ് പ്രസിഡന്റിനെ കണ്ടെത്താനുള്ള നീക്കം കടുത്ത ഗ്രൂപ്പ് പോരുമൂലം അസാധ്യമാവുകയും ചെയ്ത സാഹചര്യത്തിലാണ് രാഹുലിനെ തിരികെ കൊണ്ടുവരണമെന്ന ആവശ്യം ശക്തമായത്. നേരത്തെ രാഹുലിനെതിരെ ശക്തമായി നിലപാടെടുത്ത നേതാക്കള് പോലും രാഹുല് നിയമസഭാ സമ്മേളനത്തില് പങ്കെടുക്കണമെന്നതരത്തില് നിലപാട് തിരുത്തുകയും ചെയ്തു.
