മാരക മയക്കുമരുന്നായ എംഡിഎംഎയും കഞ്ചാവുമായി രണ്ട് നഴ്‌സിം​ഗ് വിദ്യാർത്ഥികൾ പിടിയിൽ; ഇവരിൽനിന്ന് ബാഗിൽ സൂക്ഷിച്ച 4.72 ഗ്രാം എംഡിഎംഎയും 7.24 ഗ്രാം കഞ്ചാവും പിടിച്ചെടുത്തു

തിരുവനന്തപുരം: മാരക മയക്കുമരുന്നായ എംഡിഎംഎയും കഞ്ചാവുമായി രണ്ട് നഴ്‌സിം​ഗ് വിദ്യാർത്ഥികൾ പോലീസിന്റെ പിടിയിലായി. ഇവരിൽ നിന്ന് ബാഗിൽ സൂക്ഷിച്ച 4.72 ഗ്രാം എം.ഡി.എം.എയും 7.24 ഗ്രാം കഞ്ചാവും പോലീസ് പിടികൂടി.

ബെംഗളൂരുവിലെ നഴ്‌സിം​ഗ് കോളേജ് വിദ്യാർത്ഥികളായ മൈനാഗപ്പള്ളി ശിവശൈലത്തിൽ അശ്വിൻ (21), സുഹൃത്ത്‌ മലപ്പുറം നിലമ്പൂർ വിളയിൽ വീട്ടിൽ അർജുൻ (22) എന്നിവരാണ് ശാസ്താംകോട്ട പോലീസിന്റെ പിടിയിലായത്. ഡിവൈഎസ്പിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു അറസ്റ്റ്.

ഞായറാഴ്ച വൈകിട്ട് 6 മണിയോടെ ഇരുവരും മൈനാഗപ്പള്ളിയിൽ ബസ് ഇറങ്ങി അശ്വിന്റെ വീട്ടിലേയ്ക്ക് നടക്കുന്നതിനിടെ തന്ത്രപരമായി ഇവരെ പോലീസ് സംഘം പിടികൂടുകയായിരുന്നു. തുടർന്ന് നടത്തിയ പരിശോധനയിലാണ് മയക്കുമരുന്ന് കണ്ടെത്തിയത്.

ഇവരുടെ പക്കൽ നിന്ന് ബെം​ഗളൂരുവിൽ ഇവർ താമസിച്ച ലോഡ്ജിൻ്റെ വിവരങ്ങളും യാത്ര വിവരങ്ങളും പോലീസ് ശേഖരിച്ചിട്ടുണ്ട്. നാട്ടിൽ വിൽപ്പനയ്ക്കായി എത്തിച്ചതാണ് എംഡിഎംഎയെന്ന് പോലീസ് അറിയിച്ചു.