യൂണിവേഴ്സിറ്റി കോളേജിൽ വീണ്ടും എസ്എഫ്ഐ മർദനം: 6 പേർ ചേർന്ന് ഒന്നാം വർഷ വിദ്യാർത്ഥിയെ മർദിച്ചു, മർദിച്ചവരിൽ മുൻപ് ഭിന്നശേഷിക്കാരനായ വിദ്യാർത്ഥിയെ മർദിച്ച കേസിലെ പ്രതി മിഥുനും

തിരുവനന്തപുരം: തിരുവനന്തപുരം  യൂണിവേഴ്സിറ്റി കോളേജിൽ വിദ്യാർത്ഥിക്ക് വീണ്ടും എസ്എഫ്ഐ മർദ്ദനം. ഒന്നാം വർഷ ബി.എ അറബിക് വിദ്യാർഥിയായ അബ്ദുല്ലയെ ആണ് എസ്എഫ്ഐ വിദ്യാർത്ഥികൾ സംഘം ചേർന്ന് മർദ്ദിച്ചത്. ഭിന്നശേഷിയുളള വിദ്യാർത്ഥിയെ മർദ്ദിച്ച കേസിലെ പ്രതി മിഥുന്റെ നേതൃത്വത്തിൽ ആറംഗ സംഘമാണ് മർദ്ദിച്ചത്.

തുടർന്ന് വിദ്യാർഥി കണ്ടോൺമെന്റ് പോലീസിൽ പരാതി നൽകി. അതേസമയം അബ്ദുള്ള അസഭ്യം പറഞ്ഞുവെന്ന് കോളേജ് യൂണിയൻ ചെയർപേഴ്സണും പരാതി നൽകിയിട്ടുണ്ട്.

നേരത്തെ ഭിന്നശേഷി വിദ്യാർത്ഥിയെ മർദ്ദിച്ചതിനെ തു‌ടർന്ന് യൂണിവേഴ്‌സിറ്റി കോളേജ് എസ്എഫ്‌ഐ യൂണിറ്റ് പിരിച്ചുവിട്ടിരുന്നു. കേസില്‍ പ്രതികളായ അമല്‍, മിഥുന്‍, അലന്‍ വിധു എന്നിവരുടെ അറസ്റ്റ് തടഞ്ഞതിന് പിന്നാലെയായിരുന്നു നടപടി.