മുറിച്ചിട്ട മരം ദിശതെറ്റി അ​ങ്ക​ണ​വാ​ടി കെ​ട്ടി​ട​ത്തി​ലേ​ക്ക് വീണു; ഒഴിവായത് വൻ ദുരന്തം

സ്വന്തം ലേഖകൻ

ഇ​ള​ങ്ങു​ളം: സ്വ​കാ​ര്യ​പു​ര​യി​ട​ത്തി​ൽ നി​ന്ന് വെ​ട്ടി​യി​ട്ട മ​രം അ​ങ്ക​ണ​വാ​ടി കെ​ട്ടി​ട​ത്തി​ലേ​ക്ക് പ​തി​ച്ചു. അ​ങ്ക​ണ​വാ​ടി കെ​ട്ടി​ട​ത്തിന്റെ മേൽക്കൂര തകർന്നെങ്കിലും വൻ അ‌പകടം ഒഴിവായി. മേ​ൽ​ക്കൂ​ര​യുടെ ഓ​ടു​ക​ൾ ത​ക​ർ​ന്ന് അ‌ങ്കണവാടിക്ക് ഉള്ളി​ലേക്ക് വീണെങ്കിലും കു​ട്ടി​ക​ളും ജീ​വ​ന​ക്കാ​രും പ​രി​ക്കേ​ൽ​ക്കാ​തെ ര​ക്ഷ​പ്പെ​ട്ടു.

എ​ലി​ക്കു​ളം പ​ഞ്ചാ​യ​ത്ത് 13ാം വാ​ർ​ഡി​ൽ ഇ​ള​ങ്ങു​ളം വ​ട​ക്കും​ഭാ​ഗം കെ​ട്ടി​ട​ത്തി​ന് സ​മീ​പം റോ​ഡി​ന് എ​തി​ർ​വ​ശ​ത്ത് സ്വ​കാ​ര്യ​പു​ര​യി​ട​ത്തി​ൽ നി​ന്ന മ​ഹാ​ഗ​ണി മ​ര​മാ​ണ് മു​റി​ച്ച​ത്. ശി​ഖ​ര​ങ്ങ​ൾ മു​റി​ച്ചു​മാ​റ്റാ​തെ മ​രം വെ​ട്ടി​യി​ടാ​ൻ ശ്ര​മി​ച്ച​തി​നാ​ൽ കാ​റ്റി​ന​നു​സ​രി​ച്ച് ദി​ശ​മാ​റി​യ​താ​ണ് മ​രം കെ​ട്ടി​ട​ത്തി​ലേ​ക്ക് പ​തി​ക്കാ​ൻ കാ​ര​ണം.

വൈ​ദ്യു​തി​പോ​സ്റ്റ് ത​ക​ർ​ത്ത് ലൈ​നി​ൽ ത​ങ്ങി​യ നി​ല​യി​ലാണ് മരം വീണത്. അ‌തുകൊണ്ട് വലിയ അ‌പകടമാണ് ഒഴിവായത്. ഇ​ന്ന​ലെ നാ​ലു​കു​ട്ടി​ക​ൾ മാ​ത്ര​മാ​ണ് അ​ങ്ക​ണ​വാ​ടിയിൽ ഉ​ണ്ടാ​യി​രു​ന്ന​ത്. കൂ​ടു​ത​ൽ കു​ട്ടി​ക​ൾ ഇ​ല്ലാ​തി​രു​ന്ന​തും അ​പ​ക​ട​സാ​ധ്യ​ത കു​റ​ച്ചു.

കെട്ടിടത്തിന്റെ മേൽക്കൂര തകർന്നതിനാൽ നാ​ട്ടു​കാ​ർ അ​ങ്ക​ണ​വാ​ടി​യി​ലെ ഉ​പ​ക​ര​ണ​ങ്ങ​ൾ സ​മീ​പ​ത്തെ ക​ര​യോ​ഗ കെ​ട്ടി​ട​ത്തി​ലേ​ക്ക് മാ​റ്റി. സം​ഭ​വ​മ​റി​ഞ്ഞ ഉ​ട​ൻ ത​ന്നെ പൊ​ൻ​കു​ന്നം പോ​ലീ​സും കെ​എ​സ്ഇ​ബി ജീ​വ​ന​ക്കാ​രും സ്ഥ​ല​ത്തെ​ത്തി മു​ൻ​ക​രു​ത​ൽ ന​ട​പ​ടികൾ സ്വീ​ക​രി​ച്ചു.