കണ്‍ഫോം ടിക്കറ്റ് കൈവശമുള്ളവര്‍ക്ക് മാത്രം ഇനി റെയില്‍വേ സ്റ്റേഷനുകളില്‍ പ്രവേശനം; സ്റ്റേഷനുകളിലെ തിരക്ക് കുറയ്ക്കുകയാണ് ഇതിലൂടെ ലക്ഷ്യം
റെയില്‍വേ സ്റ്റേഷനിലേക്കുള്ള പ്രവേശന നിയമങ്ങള്‍ കർശനമാക്കാൻ ഒരുങ്ങി ഇന്ത്യൻ റെയില്‍വേ. ഇനി റെയില്‍വേ സ്റ്റേഷനിലേക്ക് പ്രവേശിക്കണമെങ്കില്‍ കണ്‍ഫേം ടിക്കറ്റ് കൈയില്‍ ഉണ്ടായിരിക്കണം.
രാജ്യത്തെ 60 പ്രധാനപ്പെട്ട റെയില്‍വേ സ്റ്റേഷനുകളിലാണ് ആദ്യം നയം നടപ്പാക്കുക. റെയില്‍വേ സ്റ്റേഷനുകളിലെ തിരക്ക് കുറയ്ക്കുകയാണ് ഇതിലൂടെ ലക്ഷ്യം വയ്ക്കുന്നത്. പ്രധാന നഗരങ്ങളിലെ റെയില്‍വേ സ്റ്റേഷനുകളിലാവും നിയന്ത്രണം ആദ്യം നിലവില്‍ വരിക.
വെയിറ്റിങ് ലിസ്റ്റില്‍ ഉള്‍പ്പെടുന്നവരും ടിക്കറ്റ് ഇല്ലാത്തവരും റെയില്‍ വേസ്റ്റേഷനു പുറത്തുള്ള കാത്തിരിപ്പ് സ്ഥലത്ത് നില്‍ക്കണം എന്നാണ് പുതിയ അറിയിപ്പില്‍ സൂചിപ്പിക്കുന്നത്. പുതിയ തീരുമാനം നടപ്പിലാക്കുന്ന സ്റ്റേഷനുകളില്‍ സീനിയർ ഓഫീസറെ സ്റ്റേഷൻ ഡയറക്ടറായി നിയമിക്കും. സ്റ്റേഷന്റെ സ്ഥല പരിമിധി, ടിക്കറ്റ് ലഭ്യത എന്നിവ അനുസരിച്ച്‌ എത്ര പേർക്കു സ്റ്റേഷനില്‍ പ്രവേശിക്കാം എന്ന കാര്യത്തില്‍ തീരുമാനമെടുക്കാനുള്ള അധികാരം സ്റ്റേഷൻ ഡയറക്ടർക്കായിരിക്കും.
Whatsapp Group 1 | Whatsapp Group 2 |Telegram Group
ഭാവിയില്‍ തിരക്ക് നിയന്ത്രണവിധേയമാക്കേണ്ട റെയില്‍വേ സ്റ്റേഷനുകള്‍ ഏതൊക്കെയാണെന്ന് പരിശോധിച്ച്‌ ആയിരിക്കും പട്ടികയില്‍ കൂടുതല്‍ റെയില്‍വേ സ്റ്റേഷനുകള്‍ ചേർക്കുക. റെയില്‍വേ സ്റ്റേഷനുകളിലേക്കു ടിക്കറ്റ് ഇല്ലാതെ പോകുന്നവരെയാണ് ഇത് പ്രധാനമായും ബാധിക്കുക. റെയില്‍വേ സ്റ്റേഷനുകളിലെ തിരക്ക് നിയന്ത്രിക്കാൻ പുതിയ നയത്തിന് കരുതുമെന്നാണ് പ്രതീക്ഷിക്കുന്നത്.
