ഓണക്കാലത്ത് ട്രാഫിക് നിയമം ലംഘിച്ചാൽ പിഴയീടാക്കില്ല: പ്രത്യേക ഓഫറുമായി സർക്കാർ
തിരുവനന്തപുരം: ഓണക്കാലത്ത് ട്രാഫിക് നിയമലംഘനങ്ങളില്‍ പിഴയീടാക്കില്ലെന്ന് ഗതാഗതമന്ത്രി എ. കെ. ശശീന്ദ്രന്‍. ഓണക്കാലത്ത് പിഴയീടാക്കുന്നതിനുപകരം ബോധവത്കരണം മാത്രമേ നടത്തുകയുള്ളുവെന്നും അദ്ദേഹം അറിയിച്ചു. കൂടാതെ, ഗതാഗത നിയമ ഭേദഗതിയില്‍ ഇളവ് വേണമെന്നും ഇക്കാര്യം ആവശ്യപ്പെട്ട് കേന്ദ്ര സര്‍ക്കാരിനെ സമീപിക്കുമെന്നും അദ്ദേഹം പറഞ്ഞു.
മോട്ടോര്‍ വാഹന നിയമ ഭേദഗതി നിലവില്‍ വന്നതിനുശേഷം വന്‍തുകയാണ് പിഴയിനത്തില്‍ ലഭിച്ചത്. സംസ്ഥാനത്ത് പിഴയിനത്തില്‍ 46 ലക്ഷം രൂപ ലഭിച്ചതായി മോട്ടോര്‍വാഹന വകുപ്പ് പറഞ്ഞു. അതേസമയം, നോട്ടീസ് നൽകിയ പലരും പണം അടച്ചട്ടില്ല. അതുകൂടി എത്തുമ്പോൾ തുക ഇനിയും ഉയരും. അതായത് ഒരു ദിവസം വരുമാനം ശരാശരി ഒരു കോടി രൂപ കൂടി.
കര്‍ശന ഗതാഗത നിയമം വന്നതിനു ശേഷം ഹെല്‍മെറ്റ്. സീറ്റ്ബെല്‍റ്റ് എന്നിവ ധരിക്കുന്നവരുടെ എണ്ണം വര്‍ദ്ധിച്ചതായും ഉദ്യോഗസ്ഥര്‍ അറിയിച്ചു. ചെറുവാഹനങ്ങളിലടക്കം അമിത ഭാരം കയറ്റിയതിനാണ് പിഴ കൂടുതല്‍ ഈടാക്കിയതെന്നാണ് റിപ്പോര്‍ട്ട്.
Whatsapp Group 1 | Whatsapp Group 2 |Telegram Group
നേരത്തെ മോട്ടോർ വാഹന നിയമഭേദഗതിയിലൂടെ വൻ പിഴ ഈടക്കുന്നതിനെതിരെ സിപിഎം രംഗത്തെത്തിയിരുന്നു. പിഴ കൂട്ടുകയല്ല, നിയമം കർശനമായി നടപ്പാക്കുകയാണ് വേണ്ടതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു. ഉയര്‍ന്ന പിഴ അശാസ്ത്രീയമാണെന്നും നിയമങ്ങള്‍ അപകടങ്ങള്‍ കുറയ്ക്കാന്‍ വേണ്ടിയാകണമെന്നും അദ്ദേഹം കൂട്ടിച്ചേർത്തു.
