മുണ്ടക്കൈ ചൂരല്‍മല ഉരുള്‍പൊട്ടല്‍ : മരണപ്പെട്ട മൂന്നുപേരെക്കൂടി തിരിച്ചറിഞ്ഞു ; തിരിച്ചറിഞ്ഞത് ഡി.എന്‍.എ പരിശോധനയിലൂടെ

സ്വന്തം ലേഖകൻ

കല്‍പറ്റ: മുണ്ടക്കൈ-ചൂരല്‍മല ഉരുള്‍പൊട്ടലില്‍ മരണപ്പെട്ട മൂന്നുപേരെക്കൂടി തിരിച്ചറിഞ്ഞു. മുണ്ടക്കൈ സ്വദേശികളായ മാടമ്പാറ വീട്ടില്‍ ഫാത്തിമ, നുസ്രത്ത് ബാന്‍ഷ, ചൂരല്‍മല സ്വദേശി കുളത്തില്‍ പാത്തുമ്മ എന്നിവരെയാണ് ഡി.എന്‍.എ പരിശോധനയിലൂടെ തിരിച്ചറിഞ്ഞിരിക്കുന്നത്.

രണ്ട് ശരീര അവശിഷ്ടങ്ങളും ഒരു മൃതദേഹവും ഡി.എന്‍.എ പരിശോധയ്ക്ക് വിധേയമാക്കിയതില്‍ നിന്നാണ് ഇവരുടെ പേരുവിവരങ്ങള്‍ തിരിച്ചറിഞ്ഞത്. 47 പേരെയായിരുന്നു ദുരന്തത്തില്‍ കണ്ടെത്താനുണ്ടായിരുന്നത്.

അതില്‍ ഉള്‍പ്പെട്ട മൂന്നുപേരെയാണ് ഇപ്പോള്‍ തിരിച്ചറിഞ്ഞിരിക്കുന്നത്. നിലമ്പൂര്‍ -പോത്തുകല്ല് മേഖലയില്‍ നിന്നും കണ്ടെടുത്ത ശരീരാവശിഷ്ടങ്ങളുടെ പരിശോധനയില്‍ നിന്നാണ് മരിച്ചവരെ തിരിച്ചറിഞ്ഞത്.