ആഢ്യൻപാറ പുഴയുടെ അക്കരെ കുടുങ്ങിയ വിദ്യാർത്ഥികളെ രക്ഷപ്പെടുത്തി, വെള്ളച്ചാട്ടം കാണാൻ പോയ മൂന്നു പേരാണ് അപ്രതീക്ഷിത മലവെള്ളപ്പാച്ചിലിൽ പുഴയുടെ അക്കരെ കുടുങ്ങിയത്, രണ്ട് മണിക്കൂർ നേരത്തെ ശ്രമങ്ങൾക്കൊടുവിലാണ് വിദ്യാർത്ഥികളെ രക്ഷിച്ചത്

നിലമ്പൂര്‍: കനത്ത മഴയെ തുടര്‍ന്ന് നിലമ്പൂര്‍ ആഢ്യന്‍പാറ പുഴയ്ക്ക് അക്കരെ കുടുങ്ങിയ മൂന്ന് വിദ്യാർത്ഥികളെ രക്ഷപ്പെടുത്തി.

വെള്ളിയാഴാച രാത്രി 8.30-ഓടെയാണ് ഇവരെ ഇക്കരെയെത്തിച്ചത്. മാർത്തോമ കോളേജിൽനിന്ന് വെള്ളച്ചാട്ടം കാണാനെത്തിയ ആറംഗ സംഘത്തിലെ മൂന്ന് പേരായിരുന്നു പുഴയ്ക്ക് അക്കരെ അകപ്പെട്ടത്.

വെള്ളിയാഴ്ച രാവിലെയാണ് ഇവർ സംഘംചേർന്ന് വെള്ളച്ചാട്ടം കാണാനെത്തിയത്. പിന്നീട്, അപ്രതീക്ഷിതമായുണ്ടായ മലവെള്ളപ്പാച്ചിലിൽ മൂന്ന് പേർ പുഴയുടെ അക്കരെ കുടുങ്ങുകയായിരുന്നു.

വൈകീട്ട് 6.30ഓടെ അ​ഗ്നിരക്ഷാസേന സ്ഥലത്തെത്തി രക്ഷാപ്രവർത്തനം ആരംഭിച്ചു. തുടർന്ന്, രണ്ട് മണിക്കൂർ നേരത്തെ ശ്രമങ്ങൾക്കൊടുവിലാണ് വിദ്യാർത്ഥികളെ രക്ഷിച്ചത്.