തോട്ടയ്ക്കാട് ഉമ്പിടിയിൽ നാട്ടുകാരെ ഭീതിയിലാഴ്ത്തി യക്ഷി പതിവായി പ്രത്യക്ഷപ്പെടുന്നു ; പോലീസും നാട്ടുകാരും യക്ഷിയെ തേടി പരക്കം പായുന്നു

സ്വന്തം ലേഖകൻ

തോട്ടയ്ക്കാട് : ഉമ്പിടിയിൽ യാത്രക്കാരെയും നാട്ടുകാരെയും ഞെട്ടിച്ചുകൊണ്ട് പ്രത്യക്ഷപ്പെട്ടിരുന്ന യക്ഷിയെ തേടി പോലീസ് ഇറങ്ങി. കോട്ടയം ജില്ലയിലെ തോട്ടയ്ക്കാട് ഉമ്പിടിയിലും പരിസര പ്രദേശങ്ങളിലും ഏതാനും ദിവസങ്ങളായി കേൾക്കുന്ന യക്ഷിക്കഥയുടെ സത്യം അറിയാനും വഴിയിൽ വെളുത്ത വസ്ത്രത്തിൽ പ്രത്യക്ഷപ്പെടുന്ന യക്ഷിയെ പിടികൂടാനും പോലീസ് ഇറങ്ങിയെങ്കിലും ഇതുവരെ കണ്ടെത്താനായില്ല. കറുകച്ചാൽ ഉമ്പിടി കാരയ്ക്കാട്ടുകുന്ന് ഭാഗത്ത് ഏതാനും ദിവസമായി യക്ഷിയുടെ വിളയാട്ടം നടക്കുന്നതായി നാട്ടുകാരാണ് പോലീസിൽ അറിയിച്ചത്. പുലർച്ചെ ആളൊഴിഞ്ഞിടത്ത് വെള്ളവസ്ത്രത്തിൽ പ്രത്യക്ഷപ്പെടുന്ന യുവതി യാത്രക്കാരെ കൈകാട്ടി വിളിക്കുന്നതായും അട്ടഹസിക്കുന്നതായും പുലർച്ചെ ഇതിലേ സഞ്ചരിക്കുന്ന മീൻ, പത്ര വിൽപ്പനക്കാരാണ് ആദ്യം കണ്ടത്. സംഗതി സംസാരവിഷയമായതോടെ സിനിമയിലും മിനിസ്‌ക്രീനിലും മറ്റും മാത്രം കണ്ടു പരിചയമുള്ള യക്ഷിയെ നേരിൽക്കാണാൻ നാട്ടുകാരും രംഗത്ത് വന്നു. നാട്ടുകാർ സംസാരവിഷയമാക്കി മാറ്റിയതോടെ പോലീസ് യക്ഷിയെ പിടിക്കാനുള്ള നെട്ടോട്ടത്തിലാണ്.