തൊടുപുഴയിൽ ഓട്ടോറിക്ഷയ്ക്ക് പിറകിൽ ബൈക്ക് ഇടിച്ച് അപകടം ; റോഡിലേക്ക് തെറിച്ചു വീണ അധ്യാപകൻ ലോറി കയറി മരിച്ചു

തൊടുപുഴ :  ബൈക്ക് ഓട്ടോറിക്ഷയിൽ ഇടിച്ച്  അപകടം, റോഡിലേക്ക് തെറിച്ചു വീണ കോളേജ്അധ്യാപകൻ  ലോറി കയറി മരിച്ചു.  കുമളി മുരിക്കടി സ്വദേശിയും പുളിയൻമല ക്രൈസ്റ്റ് കോളജ് അധ്യാപകനുമായ ജോയ്‌സ് പി. ഷിബു (25) ആണ് മരിച്ചത്.

വ്യാഴാഴ്ച രാവിലെ 8.15 ഓടെ പുളിയൻമല-തൊടുപുഴ റോഡിൽ പുളിയൻമല കമ്പനിപ്പടിയിലാണ് അപകടമുണ്ടായത്.

പുളിയൻമല ഭാഗത്തുനിന്ന് കട്ടപ്പന ഭാഗത്തേയ്ക്ക് വരികയായിരുന്ന ജോയ്‌സിന്റെ ബൈക്ക് മുന്നിൽ പോകുകയായിരുന്ന ഓട്ടോറിക്ഷയിൽ ഇടിച്ചശേഷം റോഡിലേയ്ക്ക് മറിയുകയായിരുന്നു.ഈസമയം എതിരേവന്ന ലോറി ദേഹത്തുകൂടി കയറിയിറങ്ങി.

ഇതുവഴിയെത്തിയ യാത്രക്കാരും മറ്റും ചേർന്ന് ഉടൻതന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

ക്രൈസ്റ്റ് കോളേജിലെ പൂർവ വിദ്യാർഥി കൂടിയായ ജോയ്‌സ് ബി.ബി.എ അധ്യാപകനായി ഇതേ കോളേജിൽ  ജോലി ചെയ്തുവരികയായിരുന്നു.