തിരുവാർപ്പ് ക്ഷേത്രത്തിനോട് അധികൃതരുടെ അനാസ്ഥ തുടരുന്നു: ക്ഷേത്രത്തിന്റെ കൊട്ടാരം അവഗണനയുടെ തുരുത്താകുന്നു; കൊട്ടാരത്തിൻ്റെ പരിസരത്ത് തമ്പടിക്കുന്നത് മദ്യപാനികളും സാമൂഹ്യ വിരുദ്ധരും; കൊട്ടാരം ജീർണ്ണിച്ച് അപകടാവസ്ഥയിൽ

സ്വന്തം ലേഖകൻ

കോട്ടയം: തിരുവാർപ്പ് ക്ഷേത്രത്തിനോടും, ക്ഷേത്ര പരിസരത്തോടുമുള്ള അധികൃതരുടെ കടുത്ത അവഗണന തുടരുന്നു. ഏറ്റവും ഒടുവിൽ തിരുവാർപ്പ് ക്ഷേത്രത്തിലെ ദേവസ്വം കൊട്ടാരത്തിന്റെ അതി ദുരിത പൂർണമായ അവസ്ഥയാണ് ഇപ്പോൾ പുറത്തു വന്നിരിക്കുന്നത്. ജീർണ്ണിച്ച് അനാഥാവസ്ഥയിലായ കൊട്ടാരത്തിൻ്റെ പരിസരത്ത് ഇപ്പോൾ തമ്പടിച്ചിരിക്കുന്നത് സാമൂഹ്യ വിരുദ്ധരും അക്രമി സംഘവുമാണ്. രാത്രി കാലങ്ങളിൽ കൊട്ടാരത്തിൽ കടന്നു കയറുന്ന മദ്യപ സംഘമാണ് ഇവിടെ കാര്യങ്ങൾ നിയന്ത്രിക്കുന്നത്.

ചരിത്ര സ്മാരകമായി പോലും വിശേഷിപ്പിക്കാൻ സാധിക്കുന്ന കൊട്ടാരത്തോട് കടുത്ത അവഗണനയാണ് ദേവസ്വം ബോർഡും സർക്കാർ വകുപ്പുകളും പുരാവസ്ഥു വകുപ്പും നടത്തുന്നത്. തിരുവാർപ്പ് ശ്രീകൃഷ്ണസ്വാമി ക്ഷേത്രത്തിലെ പുരാതനമായ രാജകൊട്ടാരമാണ് എപ്പോൾ വേണമെങ്കിലും തകർന്നു വീഴാവുന്ന നിലയിൽ അധികൃതർക്കു മുന്നിൽ ദുരിതത്തിന്റെ തിരുശേഷിപ്പായി നില കൊള്ളുന്നത്.

രാജ്യത്ത് ഏറ്റവുമാദ്യം നട തുറക്കുന്ന ക്ഷേത്രമാണ് തിരുവാർപ്പ് ശ്രീകൃഷ്ണസ്വാമി ക്ഷേത്രം. ഇവിടുത്തെ മേൽശാന്തിക്കും കീഴ്ശാന്തിക്കും താമസിക്കുന്നതിനാണ് കൊട്ടാരം അനുവദിച്ചിരിക്കുന്നത്. നൂറ് വർഷത്തിലേറെ പഴക്കമുണ്ട് ഈ കൊട്ടാരത്തിന്. ഇത് എന്നാണ് നവീകരിച്ചതെന്നതിനു പോലും കൃത്യമായ മറുപടി നൽകാൻ ദേവസ്വം ബോർഡിനു സാധിക്കുന്നില്ല.

കൊട്ടാരമാകട്ടെ കാലപ്പുഴക്കം മൂലം ഏത് നിമിഷവും നിലംപതിക്കാവുന്ന അവസ്ഥയിലാണ്. കൊട്ടാരത്തിലെ കുളം കൊതുകുകളുടെയും മാലിന്യത്തിന്റെയും കേന്ദ്രമാണ്. പടിപ്പുര ഇടിഞ്ഞ് പൊളിഞ്ഞ് നാമാവശേഷമായി. മുറ്റം വരെ കാട്പിടിച്ച് ജീർണ്ണിച്ച അവസ്ഥയുമാണ്. കൂടാതെ ദേവസ്വം പൂങ്കാവനം എന്ന് പറഞ്ഞ് നിർമ്മിച്ച പൂക്കൾ ഒരുക്കുന്നതിനുള്ള കെട്ടിടത്തിന് ചുറ്റും സകല മാലിന്യങ്ങളും നിറഞ്ഞ് ദുർഗന്ധപൂരിതമായിക്കിടക്കുകയാണ്.

ഈ കെട്ടിടത്തിൽ ഇപ്പോൾ സാമൂഹ്യ വിരുദ്ധരും മദ്യപരുമാണ് അഴിഞ്ഞാട്ടം. ക്ഷേത്രത്തിനകത്ത് ശ്രീകോവിലിലെ കഴുക്കോൽ വരെ ജീർണ്ണാവസ്ഥയിലാണ്. ക്ഷേത്ര കാര്യങ്ങളിൽ ദേവസ്വം ബോർഡ് തികഞ്ഞ അനാസ്ഥയാണ് കാണിക്കുന്നത്- വിശേഷാവസരങ്ങളിൽ വിദൂര സ്ഥലങ്ങളിൽ നിന്ന് പോലും തീർത്ഥാടകരെത്തുന്ന ക്ഷേത്രത്തിൽ ഒരു ഗസ്റ്റ് ഹൗസ് പോലുമില്ല. അതിനുള്ള സ്ഥലം ഉണ്ടായിട്ടും ക്ഷേത്രം സംരക്ഷിക്കുന്നതിന് ആരെയും ചുമതലപ്പെടുത്തിയിട്ടുമില്ല

ഭാരതത്തിലെ തന്നെ സുപ്രസിദ്ധമായ ശ്രീ കൃഷ്ണ ക്ഷേത്രങ്ങളിലൊന്നായ തിരുവാർപ്പ് ശ്രീകൃഷ്ണസ്വാമി ക്ഷേത്രത്തോട് ദേവസ്വം ബോർഡ് കാണിക്കുന്ന അനാസ്ഥ.