അച്ഛന് ജ്വല്ലറിയുണ്ട്, വലിയ മാല തരാമെന്ന വ്യാജേന 14 കാരിയില്‍നിന്ന് സ്വർണം തട്ടിയെടുത്ത് 21കാരൻ; വിവാഹം കഴിക്കാമെന്ന് പറഞ്ഞ് നഗ്നചിത്രങ്ങളും കൈക്കലാക്കി; മലപ്പുറം സ്വദേശി മുഹമ്മദ് അജ്മല്‍ പിടിയില്‍

മലപ്പുറം: മലപ്പുറത്ത് 14 കാരിയില്‍നിന്ന് സ്വർണം തട്ടിയെടുത്ത 21കാരൻ പിടിയില്‍. പൊന്നാനി ചമ്രവട്ടം സ്വദേശി മുഹമ്മദ് അജ്മലാണ് പിടിയിലായത്.

സോഷ്യൽ മീഡിയ വഴി പരിചയപ്പെട്ട പെണ്‍കുട്ടിയില്‍ നിന്നും അഞ്ചര പവന്റെ സ്വർ‍ണമാലയാണ് ഇയാൾ തട്ടിയെടുത്തത്. മുമ്പും സമാനരീതിയിലുള്ള കുറ്റത്തിന് ജയില്‍ ശിക്ഷ അനുഭവിച്ച്‌ പുറത്തിറങ്ങിതിന് പിന്നാലെയാണ് വീണ്ടും തട്ടിപ്പ് നടത്തിയത്.

സ്‌നാപ് ചാറ്റ് വഴിയാണ് പെണ്‍കുട്ടിയും മുഹമ്മദ് അജ്മലും പരിചയപ്പെടുന്നത്. പിന്നാലെ ബന്ധം പ്രണയത്തിലേക്ക് വഴിമാറി. വിവാഹ വാഗ്ദാനം നല്‍കിയ പ്രതി പെണ്‍കുട്ടിയില്‍ നിന്ന് നഗ്ന ചിത്രങ്ങളും കൈക്കലാക്കിയിരുന്നു. അച്ഛൻ ജ്വല്ലറി ഉടമയാണെന്നും പകരം വലിയ മാല തരാമെന്നും പറഞ്ഞാണ് പ്രതി പെണ്‍കുട്ടിയെ കബളിപ്പിച്ച് സ്വർണ്ണം തട്ടിയെടുത്തത്